mawad kar ke faraham chamakti saDkon se

mavād kar ke farāham chamaktī saḌkoñ se

sajā rahā huuñ ġhazal ko na.e ḳhayāloñ se

chhupī hai un meñ na jaane kahāñ kī chīḳh-pukār

buland hote haiñ naġhme jo roz mahloñ se

nazar na aa.ī kabhī phir vo gaañv kī gorī

agarche mil ga.e dehāt aa ke shahroñ se

guzār dete haiñ umreñ vo ghup-añdheroñ meñ

laTak rahe haiñ jo bijlī ke ūñche khamboñ se

samundar ab tū unheñ aur be-qarār na kar

guzar ke aa.ī haiñ lahreñ hazār nahroñ se

tulū hogā abhī koī āftāb zarūr

dhuāñ uThā hai sar-e-shām phir charāġhoñ se

'hazīñ' ye sho.ala-e-tābāñ kabhī nahīñ bujhtā

maiñ kyuuñ hayāt ko tashbīh duuñ habāboñ se

mawad kar ke faraham chamakti saDkon se

saja raha hun ghazal ko nae KHayalon se

chhupi hai un mein na jaane kahan ki chiKH-pukar

buland hote hain naghme jo roz mahlon se

nazar na aai kabhi phir wo ganw ki gori

agarche mil gae dehat aa ke shahron se

guzar dete hain umren wo ghup-andheron mein

laTak rahe hain jo bijli ke unche khambon se

samundar ab tu unhen aur be-qarar na kar

guzar ke aai hain lahren hazar nahron se

tulu hoga abhi koi aaftab zarur

dhuan uTha hai sar-e-sham phir charaghon se

'hazin' ye shoala-e-taban kabhi nahin bujhta

main kyun hayat ko tashbih dun hababon se