waqt ki kaj-rawi se KHatra hai

vaqt kī kaj-ravī se ḳhatra hai

us kī is be-ruḳhī se ḳhatra hai

kitnā be-bas hai aadmī ki ise

ek jarsūm hī se ḳhatra hai

dasht-e-jahl-e-darūn-e-hastī ko

jalva-e-āgahī se ḳhatra hai

jis meñ hai rahzanī kī āmezish

aisī ik rahbarī se ḳhatra hai

jām-e-hastī meñ zahr jo ghole

ham ko aisī ḳhushī se ḳhatra hai

ham ko ai rāhat-e-jigar tere

bosa-e-ātishī se ḳhatra hai

zulmat-e-fitna-e-yazīdī ko

ḳhūn-e-ibn-e-'alī se ḳhatra hai

jo haqīqat meñ shā'irī hī nahīñ

ham ko us shā'irī se ḳhatra hai

har haqīqat kī ye haqīqat hai

maut ko zindagī se ḳhatra hai

rahiye muhtāt ai ‘abū-shabbar'

ujrat-e-bandagī se ḳhatra hai

waqt ki kaj-rawi se KHatra hai

us ki is be-ruKHi se KHatra hai

kitna be-bas hai aadmi ki ise

ek jarsum hi se KHatra hai

dasht-e-jahl-e-darun-e-hasti ko

jalwa-e-agahi se KHatra hai

jis mein hai rahzani ki aamezish

aisi ek rahbari se KHatra hai

jam-e-hasti mein zahr jo ghole

hum ko aisi KHushi se KHatra hai

hum ko ai rahat-e-jigar tere

bosa-e-atishi se KHatra hai

zulmat-e-fitna-e-yazidi ko

KHun-e-ibn-e-'ali se KHatra hai

jo haqiqat mein sha'iri hi nahin

hum ko us sha'iri se KHatra hai

har haqiqat ki ye haqiqat hai

maut ko zindagi se KHatra hai

rahiye muhtat ai ‘abu-shabbar'

ujrat-e-bandagi se KHatra hai