na zindagi ka koi falsafa banaya tha

na zindagī kā koī falsafa banāyā thā

na maiñ ne apne liye maut ko jagāyā thā

na tere chāñd se matlab na chāñdnī se ġharaz

bas ek she'r se apnā 'adam basāyā thā

na terī sard havāoñ se dil dukhā.ūñgā

na terī lau se kabhī apnā dil jalāyā thā

na tere sab'-samāvāt par uḌaan bharī

na terī saat zamīnoñ pe giit gaayā thā

na us ne paaoñ se zanjīr hī nikālī thī

na apnī aañkh se parda kabhī haTāyā thā

vo ek shaḳhs jo utrā thā sūrat-e-ilhām

na isti'āra na afsūñ na vo kināya thā

vo ik kalī jo chaTakne lagī thī pat-jhaḌ meñ

us ik kalī ke bharose hī abr chhāyā thā

thī mere ḳhvāb ke andar vo tīrgī raushan

'ajīb dhuup thī us pal 'ajīb saaya thā

mujhe bhī vaqt ke mā'nī pata na the 'bāsit'

phir ek roz kisī ne gale lagāyā thā

na zindagi ka koi falsafa banaya tha

na main ne apne liye maut ko jagaya tha

na tere chand se matlab na chandni se gharaz

bas ek she'r se apna 'adam basaya tha

na teri sard hawaon se dil dukhaunga

na teri lau se kabhi apna dil jalaya tha

na tere sab'-samawat par uDan bhari

na teri sat zaminon pe git gaya tha

na us ne paon se zanjir hi nikali thi

na apni aankh se parda kabhi haTaya tha

wo ek shaKHs jo utra tha surat-e-ilham

na isti'ara na afsun na wo kinaya tha

wo ek kali jo chaTakne lagi thi pat-jhaD mein

us ek kali ke bharose hi abr chhaya tha

thi mere KHwab ke andar wo tirgi raushan

'ajib dhup thi us pal 'ajib saya tha

mujhe bhi waqt ke ma'ni pata na the 'basit'

phir ek roz kisi ne gale lagaya tha