KHizan ke tan pe hawaon ke taziyane lage

ḳhizāñ ke tan pe havāoñ ke tāziyāne lage

ba-rang-e-zaḳhm ka.ī phuul muskurāne lage

bas ek maut kī ḳhvāhish ko aur jiine do

kahīñ hayāt kī ye laash to Thikāne lage

kisī kī god meñ tū chāñd ban ke Duub gayā

kisī ke haath tirī yaad ke ḳhazāne lage

ye shab ke saa.e mirī ḳhāmushī kā husn bhī the

magar ye saa.e to ab shor bhī machāne lage

jinheñ batāyā thā maiñ ne gudāz-e-gul kā asar

vo pattharoñ se yahī daañv āzmāne lage

hayāt saañs ke zindāñ kā ek lamha hai

is ek baat ko kahte hue zamāne lage

nazar nazar ko dikhāte ho zaḳhm-e-jāñ 'aḳhtar'

magar ye log mudāvā kahāñ banāne lage

KHizan ke tan pe hawaon ke taziyane lage

ba-rang-e-zaKHm kai phul muskurane lage

bas ek maut ki KHwahish ko aur jine do

kahin hayat ki ye lash to Thikane lage

kisi ki god mein tu chand ban ke Dub gaya

kisi ke hath teri yaad ke KHazane lage

ye shab ke sae meri KHamushi ka husn bhi the

magar ye sae to ab shor bhi machane lage

jinhen bataya tha main ne gudaz-e-gul ka asar

wo pattharon se yahi danw aazmane lage

hayat sans ke zindan ka ek lamha hai

is ek baat ko kahte hue zamane lage

nazar nazar ko dikhate ho zaKHm-e-jaan 'aKHtar'

magar ye log mudawa kahan banane lage