dil pe ek bojh hai aur hai ye bahut bhaari bhi
dil pe ik bojh hai aur hai ye bahut bhārī bhī
maut kā shauq hai aur kuchh nahīñ tayyārī bhī
koī dushman to koī dost samajh letā hai
sāf-goī meñ hai āsānī bhī dushvārī bhī
ho nahīñ paatā hai sahrā kā samundar se milan
aañkh rahtī hai kabhī ḳhushk kabhī jaarī bhī
mat hañsā kar kisī majbūr kī majbūrī par
kal ko aa jā.egī nādān tirī baarī bhī
aisā dukh bhī kabhī maiñ she'r meñ le aatā huuñ
dil se mahsūs kare jis ko mirā qaarī bhī
bolte bolte royā to kahā apnoñ ne
dāstāñ ḳhuub hai achchhī hai adākārī bhī
lutf-o-'azmat bhī hai mehnat kī kamā.ī meñ 'vaqī'
bhiik to saath hī le jaatī hai ḳhuddārī bhī
dil pe ek bojh hai aur hai ye bahut bhaari bhi
maut ka shauq hai aur kuchh nahin tayyari bhi
koi dushman to koi dost samajh leta hai
saf-goi mein hai aasani bhi dushwari bhi
ho nahin pata hai sahra ka samundar se milan
aankh rahti hai kabhi KHushk kabhi jari bhi
mat hansa kar kisi majbur ki majburi par
kal ko aa jaegi nadan teri bari bhi
aisa dukh bhi kabhi main she'r mein le aata hun
dil se mahsus kare jis ko mera qari bhi
bolte bolte roya to kaha apnon ne
dastan KHub hai achchhi hai adakari bhi
lutf-o-'azmat bhi hai mehnat ki kamai mein 'waqi'
bhik to sath hi le jati hai KHuddari bhi
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
