chaar din ki to zindagani hai

chaar din kī to zindagānī hai

phir bhī marne kī tum ne Thānī hai

kaam mushkil koī nahīñ lagtā

ham ne paanī se miTTī chhānī hai

chāhe kitnī girāvaTeñ aa.eñ

apnī qīmat nahīñ girānī hai

maiñ tirī maañ se baat kar lūñgī

bas tujhe haañ meñ haañ milānī hai

us kā takiya sañbhāl kar rakkhā

is meñ ḳhushbū vahī purānī hai

har jagah us kī baat kartī hai

tū to us kī baḌī divānī hai

jhuuT hī keh do vo bhī achchhe haiñ

rishtedārī bhī to nibhānī hai

mujh ko dilchaspī ab nahīñ tujh meñ

tū mire maazī kī kahānī hai

is meñ chāhat bhī hai mohabbat bhī

ye mire pyaar kī nishānī hai

chaar din ki to zindagani hai

phir bhi marne ki tum ne Thani hai

kaam mushkil koi nahin lagta

hum ne pani se miTTi chhani hai

chahe kitni girawaTen aaen

apni qimat nahin girani hai

main teri man se baat kar lungi

bas tujhe han mein han milani hai

us ka takiya sanbhaal kar rakkha

is mein KHushbu wahi purani hai

har jagah us ki baat karti hai

tu to us ki baDi diwani hai

jhuT hi keh do wo bhi achchhe hain

rishtedari bhi to nibhani hai

mujh ko dilchaspi ab nahin tujh mein

tu mere mazi ki kahani hai

is mein chahat bhi hai mohabbat bhi

ye mere pyar ki nishani hai