mat jaaniye paikar mein bas naz-o-ada ka

mat jāniye paikār meñ bas nāz-o-adā kā

aurat meñ hai dam ma.arka-e-jaur-o-jafā kā

manzil pe pahuñch sakte nahīñ aise musāfir

har gaam pe ho ḳhauf jinheñ ābla-pā kā

har dard kā darmāñ hai sharāb-e-ġham-e-ulfat

ik ghūñT meñ ham piite haiñ ik jaam shifā kā

maiñ sun ke jise lauT ga.ī biich safar se

mānūs sadā thī ki vo dhokā thā sadā kā

benām-o-nishāñ barg sī āvāra-e-manzil

kuchh mujh pe karam shāḳh kā kuchh zor havā kā

sahrā-e-mohabbat hai sarāboñ kā tasalsul

hāsil hai faqat tishnagī 'resham' kī vafā kā

mat jaaniye paikar mein bas naz-o-ada ka

aurat mein hai dam marka-e-jaur-o-jafa ka

manzil pe pahunch sakte nahin aise musafir

har gam pe ho KHauf jinhen aabla-pa ka

har dard ka darman hai sharab-e-gham-e-ulfat

ek ghunT mein hum pite hain ek jam shifa ka

main sun ke jise lauT gai bich safar se

manus sada thi ki wo dhoka tha sada ka

benam-o-nishan barg si aawara-e-manzil

kuchh mujh pe karam shaKH ka kuchh zor hawa ka

sahra-e-mohabbat hai sarabon ka tasalsul

hasil hai faqat tishnagi 'resham' ki wafa ka