apni masti ki tere qurb ki sarshaari mein

apnī mastī ki tire qurb kī sarshārī meñ

ab maiñ kuchh aur bhī āsān huuñ dushvārī meñ

kitnī zarḳhez hai nafrat ke liye dil kī zamīñ

vaqt lagtā hī nahīñ fasl kī tayyārī meñ

ik ta'alluq ko bikharne se bachāne ke liye

mere din raat guzarte haiñ adākārī meñ

vo kisī aur davā se mirā kartā hai 'ilāj

mubtalā huuñ maiñ kisī aur hī bīmārī meñ

ai zamāne maiñ tire ashk bhī ro lūñgā magar

abhī masrūf huuñ ḳhud apnī 'azā-dārī meñ

us ke kamre se uThā laayā huuñ yādeñ apnī

ḳhud paḌā rah gayā lekin kisī almārī meñ

apnī tā'mīr uThāte to koī baat bhī thī

tum ne ik 'umr gañvā dī mirī mismārī meñ

ham agar aur na kuchh der havā deñ to ye aag

saañs ghuTne se hī mar jā.egī chingārī meñ

tum bhī duniyā ke nikāle hue lagte ho 'zahīr'

maiñ bhī rahtā huuñ yahīñ dil kī 'amal-dārī meñ

apni masti ki tere qurb ki sarshaari mein

ab main kuchh aur bhi aasan hun dushwari mein

kitni zarKHez hai nafrat ke liye dil ki zamin

waqt lagta hi nahin fasl ki tayyari mein

ek ta'alluq ko bikharne se bachane ke liye

mere din raat guzarte hain adakari mein

wo kisi aur dawa se mera karta hai 'ilaj

mubtala hun main kisi aur hi bimari mein

ai zamane main tere ashk bhi ro lunga magar

abhi masruf hun KHud apni 'aza-dari mein

us ke kamre se uTha laya hun yaaden apni

KHud paDa rah gaya lekin kisi almari mein

apni ta'mir uThate to koi baat bhi thi

tum ne ek 'umr ganwa di meri mismari mein

hum agar aur na kuchh der hawa den to ye aag

sans ghuTne se hi mar jaegi chingari mein

tum bhi duniya ke nikale hue lagte ho 'zahir'

main bhi rahta hun yahin dil ki 'amal-dari mein