chhup ke ghar ghair ke jaya na karo

chhup ke ghar ġhair ke jaayā na karo

rabt har ik se baḌhāyā na karo

ai buto baal banāyā na karo

saañp hāthoñ pe khelāyā na karo

sabza-e-ḳhat ko dikhāyā na karo

tote hāthoñ ke uḌāyā na karo

riñd ġham hijr kā khāyā na karo

jaan ko apnī khapāyā na karo

tazkira ġhair kā laayā na karo

jale ko aur jalāyā na karo

muñh ko ġhunche ke chiḌāyā na karo

gul ko khillī meñ uḌāyā na karo

mudda.ā jo ho zabāñ se kaho saaf

harf-e-matlab ko chabāyā na karo

apnā samjho mirā dil shauq se lo

merī jaañ apnā parāyā na karo

mujh ko bhī yaad haiñ fiqre sāhib

joḌ bande pe banāyā na karo

ḳhud maiñ dam-bāz huuñ hai dhyān kidhar

mujh ko fiqroñ meñ uḌāyā na karo

hosh meñ aao parī-zādo tum

mujh ko dīvāna banāyā na karo

ham lahū thuuk ke mar jā.eñge

laalī hoñToñ pe jamāyā na karo

log saudā.ī hue jaate haiñ

dhaḌī missī kī lagāyā na karo

ho na añgusht-numā misl-e-hilāl

jaan nauchandī meñ jaayā na karo

ai buto apne ḳhudā ko maano

ka.aba-e-dil ko to Dhāyā na karo

maiñ to hāzir huuñ vafādārī meñ

tum karo mujh se vafā yā na karo

dhoke dariyā meñ bhabūkā se haath

aag paanī meñ lagāyā na karo

mujh se ḳhalvat kī mulāqāt rahe

roz jalvat meñ bulāyā na karo

vāste bande ke bad-nāmī hai

jaan sohbat meñ biThāyā na karo

dekhne vāloñ kī jānib dekho

is tarah aañkh churāyā na karo

sharm bejā hai burā karte ho

achchhī sūrat ko chhupāyā na karo

jaao dariyā pe na tum ġhair ke saath

aise meñDhe to laḌāyā na karo

daañt piisā na karo āshiq par

jaan yuuñ hoñTh chabāyā na karo

chaar din vasl meñ hañs lene do

aaTh aaTh aañsū rulāyā na karo

log bad-vaza.a kaheñge tum ko

mele-Thele kabhī jaayā na karo

jaan kis kaam kā ye bholā-pan

dam meñ har ek ke aayā na karo

āshiqoñ kī burī gat hotī hai

tum sitārī to bajāyā na karo

hazrat-e-dil yahī farmāte haiñ

ishq-e-ma.ashūq chhupāyā na karo

ḳhush nahīñ aatā agar merā kalām

to ġhazal bhī mirī gaayā na karo

thāmo ab qabza-e-shamshīr ai 'rind'

koft par koft uThāyā na karo

chhup ke ghar ghair ke jaya na karo

rabt har ek se baDhaya na karo

ai buto baal banaya na karo

sanp hathon pe khelaya na karo

sabza-e-KHat ko dikhaya na karo

tote hathon ke uDaya na karo

rind gham hijr ka khaya na karo

jaan ko apni khapaya na karo

tazkira ghair ka laya na karo

jale ko aur jalaya na karo

munh ko ghunche ke chiDaya na karo

gul ko khilli mein uDaya na karo

muddaa jo ho zaban se kaho saf

harf-e-matlab ko chabaya na karo

apna samjho mera dil shauq se lo

meri jaan apna paraya na karo

mujh ko bhi yaad hain fiqre sahib

joD bande pe banaya na karo

KHud main dam-baz hun hai dhyan kidhar

mujh ko fiqron mein uDaya na karo

hosh mein aao pari-zado tum

mujh ko diwana banaya na karo

hum lahu thuk ke mar jaenge

lali honTon pe jamaya na karo

log saudai hue jate hain

dhaDi missi ki lagaya na karo

ho na angusht-numa misl-e-hilal

jaan nauchandi mein jaya na karo

ai buto apne KHuda ko mano

kaba-e-dil ko to Dhaya na karo

main to hazir hun wafadari mein

tum karo mujh se wafa ya na karo

dhoke dariya mein bhabuka se hath

aag pani mein lagaya na karo

mujh se KHalwat ki mulaqat rahe

roz jalwat mein bulaya na karo

waste bande ke bad-nami hai

jaan sohbat mein biThaya na karo

dekhne walon ki jaanib dekho

is tarah aankh churaya na karo

sharm beja hai bura karte ho

achchhi surat ko chhupaya na karo

jao dariya pe na tum ghair ke sath

aise meinDhe to laDaya na karo

dant pisa na karo aashiq par

jaan yun honTh chabaya na karo

chaar din wasl mein hans lene do

aaTh aaTh aansu rulaya na karo

log bad-waza kahenge tum ko

mele-Thele kabhi jaya na karo

jaan kis kaam ka ye bhola-pan

dam mein har ek ke aaya na karo

aashiqon ki buri gat hoti hai

tum sitari to bajaya na karo

hazrat-e-dil yahi farmate hain

ishq-e-mashuq chhupaya na karo

KHush nahin aata agar mera kalam

to ghazal bhi meri gaya na karo

thamo ab qabza-e-shamshir ai 'rind'

koft par koft uThaya na karo