masarraton ko ye ahl-e-hawas na kho dete

masarratoñ ko ye ahl-e-havas na kho dete

jo har ḳhushī meñ tire ġham ko bhī samo dete

kahāñ vo shab ki tire gesuoñ ke saa.e meñ

ḳhayāl-e-sub.h se ham āstīñ bhigo dete

bahāne aur bhī hote jo zindagī ke liye

ham ek baar tirī aarzū bhī kho dete

bachā liyā mujhe tūfāñ kī mauj ne varna

kināre vaale safīna mirā Dubo dete

jo dekhte mirī nazroñ pe bandishoñ ke sitam

to ye nazāre mirī bebasī pe ro dete

kabhī to yuuñ bhī umañDte sarishk-e-ġham 'majrūh'

ki mere zaḳhm-e-tamannā ke daaġh dho dete

masarraton ko ye ahl-e-hawas na kho dete

jo har KHushi mein tere gham ko bhi samo dete

kahan wo shab ki tere gesuon ke sae mein

KHayal-e-subh se hum aastin bhigo dete

bahane aur bhi hote jo zindagi ke liye

hum ek bar teri aarzu bhi kho dete

bacha liya mujhe tufan ki mauj ne warna

kinare wale safina mera Dubo dete

jo dekhte meri nazron pe bandishon ke sitam

to ye nazare meri bebasi pe ro dete

kabhi to yun bhi umanDte sarishk-e-gham 'majruh'

ki mere zaKHm-e-tamanna ke dagh dho dete