marne ka sukh jine ki aasani de

marne kā sukh jiine kī āsānī de

andātā kaisā hai aag na paanī de

is dhartī par hariyālī kī jot jagā

kaale meghā paanī de gardānī de

band aflāk kī dīvāroñ meñ rauzan kar

koī to manzar mujh ko imkānī de

mere dil par khol kitāboñ ke asrār

merī aañkh ko apnī saaf nishānī de

arz o samā ke pas-manzar se sāmne aa

dil ko yaqīñ de āñkhoñ ko hairānī de

mere hone mere na hone meñ kyā hai

maut ko mafhūm is hastī ko ma.ānī de

barakat de din pherne vaalī duāoñ ko

raat ko koī ḳhush-tābīr kahānī de

TūTtī rahtī hai kachche dhāge sī niiñd

āñkhoñ ko ThanDak ḳhvāboñ ko girānī de

mujh ko jahāñ ke sātoñ sukh dene vaale

denā hai to koī daulat lā-fānī de

tujh se judā ho kar to maiñ mar jā.ūñgā

mujh ko apnā sar ai dost nishānī de

ik ik patthar raah kā 'zeb' haTātā chal

pīchhe aane vāloñ ko āsānī de

marne ka sukh jine ki aasani de

andata kaisa hai aag na pani de

is dharti par hariyali ki jot jaga

kale megha pani de gardani de

band aflak ki diwaron mein rauzan kar

koi to manzar mujh ko imkani de

mere dil par khol kitabon ke asrar

meri aankh ko apni saf nishani de

arz o sama ke pas-manzar se samne aa

dil ko yaqin de aankhon ko hairani de

mere hone mere na hone mein kya hai

maut ko mafhum is hasti ko maani de

barakat de din pherne wali duaon ko

raat ko koi KHush-tabir kahani de

TuTti rahti hai kachche dhage si nind

aankhon ko ThanDak KHwabon ko girani de

mujh ko jahan ke saton sukh dene wale

dena hai to koi daulat la-fani de

tujh se juda ho kar to main mar jaunga

mujh ko apna sar ai dost nishani de

ek ek patthar rah ka 'zeb' haTata chal

pichhe aane walon ko aasani de