aap ki sun kar ghazal main shadman hone laga

aap kī sun kar ġhazal maiñ shādmāñ hone lagā

ye ġhazal maiñ ne kahī hai ye gumāñ hone lagā

vaqt hī ne sī diye the hoñT mere kyā karūñ

merā likkhā ġhair ke lab se bayāñ hone lagā

sarfarāzī kā vo andāza kare bhī kis tarah

jo zamīñ par rahte rahte āsmāñ hone lagā

jis ko raste kā patā hai aur na manzil kā surāġh

aadmī aisā bhī mīr-e-kārvāñ hone lagā

ek chingārī ne vo aafat machā.ī kuchh na pūchh

chand lamhoñ meñ makāñ jal kar dhuāñ hone lagā

vaqf kar dī maiñ ne apnī zindagī jis ke liye

vo mirā ho kar bhī ab merā kahāñ hone lagā

dāstān-e-zindagī kis ko sunā.ūñ maiñ 'hasan'

ab buḌhāpe meñ badan merā kamāñ hone lagā

aap ki sun kar ghazal main shadman hone laga

ye ghazal main ne kahi hai ye guman hone laga

waqt hi ne si diye the honT mere kya karun

mera likkha ghair ke lab se bayan hone laga

sarfaraazi ka wo andaza kare bhi kis tarah

jo zamin par rahte rahte aasman hone laga

jis ko raste ka pata hai aur na manzil ka suragh

aadmi aisa bhi mir-e-karwan hone laga

ek chingari ne wo aafat machai kuchh na puchh

chand lamhon mein makan jal kar dhuan hone laga

waqf kar di main ne apni zindagi jis ke liye

wo mera ho kar bhi ab mera kahan hone laga

dastan-e-zindagi kis ko sunaun main 'hasan'

ab buDhape mein badan mera kaman hone laga