manzil ki dhum dham se jab ji uchaT gaya

manzil kī dhuum dhaam se jab jī uchaT gayā

rah-gīr jaise saiñkaḌoñ rastoñ meñ baT gayā

afsos dil tak aane kī rāheñ na khul sakīñ

koī faqat ḳhayāl tak aa kar palaT gayā

ham taul baiThe sub.h-dam insāñ ko saa.e se

sūraj ke sar pe aate hī saayā simaT gayā

kyā jaane kis chaTān se Takrā gayā hai dil

chaltā huā safīna achānak ulaT gayā

ab koī DhūñD-DhāñD ke laao nayā vajūd

insān to bulandi-e-insāñ se ghaT gayā

manzil pe gard-e-vahm-o-gumāñ thī vo dhul ga.ī

raste meñ aql o hosh kā patthar thā haT gayā

mahfil bhī nūr-bār hai saaqī bhī ḳhum ba-dosh

mere hī naav nosh kā meyār ghaT gayā

manzil kahīñ milī na milī lekin ai 'razā'

manzil ke ishtiyāq meñ rastā to kaT gayā

manzil ki dhum dham se jab ji uchaT gaya

rah-gir jaise sainkaDon raston mein baT gaya

afsos dil tak aane ki rahen na khul sakin

koi faqat KHayal tak aa kar palaT gaya

hum taul baiThe subh-dam insan ko sae se

suraj ke sar pe aate hi saya simaT gaya

kya jaane kis chaTan se Takra gaya hai dil

chalta hua safina achanak ulaT gaya

ab koi DhunD-DhanD ke lao naya wajud

insan to bulandi-e-insan se ghaT gaya

manzil pe gard-e-wahm-o-guman thi wo dhul gai

raste mein aql o hosh ka patthar tha haT gaya

mahfil bhi nur-bar hai saqi bhi KHum ba-dosh

mere hi naw nosh ka meyar ghaT gaya

manzil kahin mili na mili lekin ai 'raza'

manzil ke ishtiyaq mein rasta to kaT gaya