main dil ki shahi mein KHush hun dil uski shahi mein

maiñ dil kī shāhī meñ ḳhush huuñ dil us kī shāhī meñ

so pāñchoñ ungliyāñ ghī meñ haiñ sar kaḌāhī meñ

ye jitnī tezī se ābād ho rahī hai zamīñ

ziyāda vaqt nahīñ rah gayā tabāhī meñ

vo chehra haT gayā khiḌkī se bijlī aate hī

'ilāqa Duub gayā ek dam siyāhī meñ

na hone vaale havādis kā Dar na ḳhauf-e-zarar

'ajīb fā.ede hote haiñ kam-nigāhī meñ

kisī kī hifz-o-amāñ ban rahī hai merā junūñ

use tabāh na kar duuñ maiñ ḳhair-ḳhvāhī meñ

vo mar chukā hai kisī par so laḌ nahīñ saktā

magar ye kahne kī himmat nahīñ sipāhī meñ

hamāre haq meñ faqat ek shaḳhs pesh huā

aur aa ke kuchh bhī nahīñ keh sakā gavāhī meñ

nizām-e-zāt salīqe se chal sakegā agar

dimāġh kaam kare dil kī sarbarāhī meñ

main dil ki shahi mein KHush hun dil us ki shahi mein

so panchon ungliyan ghi mein hain sar kaDahi mein

ye jitni tezi se aabaad ho rahi hai zamin

ziyaada waqt nahin rah gaya tabahi mein

wo chehra haT gaya khiDki se bijli aate hi

'ilaqa Dub gaya ek dam siyahi mein

na hone wale hawadis ka Dar na KHauf-e-zarar

'ajib faede hote hain kam-nigahi mein

kisi ki hifz-o-aman ban rahi hai mera junun

use tabah na kar dun main KHair-KHwahi mein

wo mar chuka hai kisi par so laD nahin sakta

magar ye kahne ki himmat nahin sipahi mein

hamare haq mein faqat ek shaKHs pesh hua

aur aa ke kuchh bhi nahin keh saka gawahi mein

nizam-e-zat saliqe se chal sakega agar

dimagh kaam kare dil ki sarbarahi mein