main bhi ai kash kabhi mauj-e-saba ho jaun

maiñ bhī ai kaash kabhī mauj-e-sabā ho jā.ūñ

is tavaqqo pe ki ḳhud se bhī judā ho jā.ūñ

abr uTThe to simaT jā.ūñ tirī āñkhoñ meñ

dhuup nikle to tire sar kī ridā ho jā.ūñ

aaj kī raat ujāle mire ham-sāya haiñ

aaj kī raat jo so luuñ to nayā ho jā.ūñ

ab yahī soch liyā dil meñ ki manzil ke baġhair

ghar palaT aa.uuñ to maiñ ābla-pā ho jā.ūñ

phuul kī tarah mahaktā huuñ tirī yaad ke saath

ye alag baat ki maiñ tujh se ḳhafā ho jā.ūñ

jis ke kūche meñ baraste rahe patthar mujh par

us ke hāthoñ ke liye rañg-e-hinā ho jā.ūñ

aarzū ye hai ki taqdīs-e-hunar kī ḳhātir

tere hoñToñ pe rahūñ hamd-o-sanā ho jā.ūñ

marhala apnī parastish kā ho darpesh to maiñ

apne hī sāmne mā.il-ba-duā ho jā.ūñ

tīsha-e-vaqt batā.e ki ta.āruf ke liye

kin pahāḌoñ kī bulandī pe khaḌā ho jā.ūñ

haa.e vo log ki maiñ jin kā pujārī huuñ 'nasīr'

haa.e vo log ki maiñ jin kā ḳhudā ho jā.ūñ

main bhi ai kash kabhi mauj-e-saba ho jaun

is tawaqqo pe ki KHud se bhi juda ho jaun

abr uTThe to simaT jaun teri aankhon mein

dhup nikle to tere sar ki rida ho jaun

aaj ki raat ujale mere ham-saya hain

aaj ki raat jo so lun to naya ho jaun

ab yahi soch liya dil mein ki manzil ke baghair

ghar palaT aaun to main aabla-pa ho jaun

phul ki tarah mahakta hun teri yaad ke sath

ye alag baat ki main tujh se KHafa ho jaun

jis ke kuche mein baraste rahe patthar mujh par

us ke hathon ke liye rang-e-hina ho jaun

aarzu ye hai ki taqdis-e-hunar ki KHatir

tere honTon pe rahun hamd-o-sana ho jaun

marhala apni parastish ka ho darpesh to main

apne hi samne mail-ba-dua ho jaun

tisha-e-waqt batae ki taaruf ke liye

kin pahaDon ki bulandi pe khaDa ho jaun

hae wo log ki main jin ka pujari hun 'nasir'

hae wo log ki main jin ka KHuda ho jaun