tauba ki nazishon pe sitam Dha ke pi gaya

tauba kī nāzishoñ pe sitam Dhā ke pī gayā

''pī''! us ne jab kahā to maiñ ghabrā ke pī gayā

dil hī to hai uThā.e kahāñ tak ġham-o-alam

maiñ roz ke malāl se uktā ke pī gayā

thiiñ laakh garche mahshar o marqad kī uljhaneñ

gutthī ko zabt-e-shauq kī suljhā ke pī gayā

mai-ḳhāna-e-bahār meñ muddat kā tishna-lab

saaqī ḳhatā-muāf! ḳhatā khā ke pī gayā

niyyat nahīñ ḳharāb na aadī huuñ ai nadīm!

''ālām-e-rozgār se tañg aa ke pī gayā''!

saaqī ke husn-e-dīda-e-mai-gūñ ke sāmne

maiñ jalva-e-bahisht ko Thukrā ke pī gayā

uTThā jo abr dil kī umañgeñ chamak uThīñ

lahrā.īñ bijliyāñ to maiñ lahrā ke pī gayā

dil kuchh subūt-e-hifz-e-sharī.at na de sakā

saaqī ke lutf-e-ḳhās pe itrā ke pī gayā

tauba ki nazishon pe sitam Dha ke pi gaya

pi! us ne jab kaha to main ghabra ke pi gaya

dil hi to hai uThae kahan tak gham-o-alam

main roz ke malal se ukta ke pi gaya

thin lakh garche mahshar o marqad ki uljhanen

gutthi ko zabt-e-shauq ki suljha ke pi gaya

mai-KHana-e-bahaar mein muddat ka tishna-lab

saqi KHata-muaf! KHata kha ke pi gaya

niyyat nahin KHarab na aadi hun ai nadim!

aalam-e-rozgar se tang aa ke pi gaya!

saqi ke husn-e-dida-e-mai-gun ke samne

main jalwa-e-bahisht ko Thukra ke pi gaya

uTTha jo abr dil ki umangen chamak uThin

lahrain bijliyan to main lahra ke pi gaya

dil kuchh subut-e-hifz-e-shariat na de saka

saqi ke lutf-e-KHas pe itra ke pi gaya