hans hans ke jam jam ko chhalka ke pi gaya

hañs hañs ke jaam jaam ko chhalkā ke pī gayā

vo ḳhud pilā rahe the maiñ lahrā ke pī gayā

tauba ke TūTne kā bhī kuchh kuchh malāl thā

tham tham ke soch soch ke sharmā ke pī gayā

sāġhar-ba-dast baiThī rahī merī aarzū

saaqī shafaq se jaam ko Takrā ke pī gayā

vo dushmanoñ ke tanz ko Thukrā ke pī ga.e

maiñ dostoñ ke ġhaiz ko bhaḌkā ke pī gayā

sad.hā mutālibāt ke ba.ad ek jām-e-talḳh

duniyā-e-jabr-o-sabr ko dhaḌkā ke pī gayā

sau baar laġhzishoñ kī qasam khā ke chhoḌ dī

sau baar chhoḌne kī qasam khā ke pī gayā

piitā kahāñ thā sub.h-e-azal maiñ bhalā 'adam'

saaqī ke e'tibār pe lahrā ke pī gayā

hans hans ke jam jam ko chhalka ke pi gaya

wo KHud pila rahe the main lahra ke pi gaya

tauba ke TuTne ka bhi kuchh kuchh malal tha

tham tham ke soch soch ke sharma ke pi gaya

saghar-ba-dast baiThi rahi meri aarzu

saqi shafaq se jam ko Takra ke pi gaya

wo dushmanon ke tanz ko Thukra ke pi gae

main doston ke ghaiz ko bhaDka ke pi gaya

sadha mutalibaat ke baad ek jam-e-talKH

duniya-e-jabr-o-sabr ko dhaDka ke pi gaya

sau bar laghzishon ki qasam kha ke chhoD di

sau bar chhoDne ki qasam kha ke pi gaya

pita kahan tha subh-e-azal main bhala 'adam'

saqi ke e'tibar pe lahra ke pi gaya