wo kya kahenge surat-e-bimar dekh kar

vo kyā kaheñge sūrat-e-bīmār dekh kar

andāza hai har ek ko āsār dekh kar

ham baḌh rahe the jin ko taraf-dār dekh kar

vo ruk gaye zamāne kī raftār dekh kar

un kī nazar bhī hai sar-e-mahshar jhukī huī

kuchh ham bhī chup haiñ majma-e-aġhyār dekh kar

tūl-e-ġham-e-hayāt se ghabrā gayā thā maiñ

lekin sañbhal gayā nigah-e-yār dekh kar

parvāne apne 'ishq meñ sābit-qadam rahe

āñkhoñ se apnī maut ke āsār dekh kar

bijlī girā.ī tuur pe to kyā kamāl hai

jalva dikhāo tāqat-e-dīdār dekh kar

ham ko kuchh aisī baar na thī apnī zindagī

jaañ dī hai sirf maut kā isrār dekh kar

kaise uThegā hashr na samjhe the aaj tak

andāza ho gayā tirī raftār dekh kar

muḌ kar bhī rah-ravān-e-‘adam dekhte nahīñ

aise chale haiñ raah ko hamvār dekh kar

merī tarah se koī ho maġhmūm kis liye

dete haiñ ġham vo zarf-e-talab-gār dekh kar

duniyā ke dil dukhāne kā sadma nahīñ 'adīl'

sadma hai un ko darpai-e-āzār dekh kar

wo kya kahenge surat-e-bimar dekh kar

andaza hai har ek ko aasar dekh kar

hum baDh rahe the jin ko taraf-dar dekh kar

wo ruk gaye zamane ki raftar dekh kar

un ki nazar bhi hai sar-e-mahshar jhuki hui

kuchh hum bhi chup hain majma-e-aghyar dekh kar

tul-e-gham-e-hayat se ghabra gaya tha main

lekin sanbhal gaya nigah-e-yar dekh kar

parwane apne 'ishq mein sabit-qadam rahe

aankhon se apni maut ke aasar dekh kar

bijli girai tur pe to kya kamal hai

jalwa dikhao taqat-e-didar dekh kar

hum ko kuchh aisi bar na thi apni zindagi

jaan di hai sirf maut ka israr dekh kar

kaise uThega hashr na samjhe the aaj tak

andaza ho gaya teri raftar dekh kar

muD kar bhi rah-rawan-e-‘adam dekhte nahin

aise chale hain rah ko hamwar dekh kar

meri tarah se koi ho maghmum kis liye

dete hain gham wo zarf-e-talab-gar dekh kar

duniya ke dil dukhane ka sadma nahin 'adil'

sadma hai un ko darpai-e-azar dekh kar