waqt ki dhaar mein tezi kabhi aisi to na thi

vaqt kī dhaar meñ tezī kabhī aisī to na thī

ḳhuuñ meñ ġhaltīda mirī zindagī aisī to na thī

aarzū pahle mujhe maut kī aisī to na thī

dil ke āñgan meñ kabhī tīrgī aisī to na thī

Daal deñge mire kaase meñ vo ḳhud ko ik din

kabhī tāsīr sadā meñ mirī aisī to na thī

kisī tūfāñ ke ye āsār na hoñ dil vaalo

un nigāhoñ meñ kabhī ḳhāmushī aisī to na thī

khīñch dī kis ne had-e-ġham pe tabassum kī fasīl

kūcha-e-dard meñ tābindagī aisī to na thī

kaun ḳhvāboñ ke gharauñde bhī mire toḌ gayā

thī magar mujh se unheñ dushmanī aisī to na thī

jaane kis dasht meñ kho.e gaye saare saa.e

dhuup hangāmoñ kī pahle kabhī aisī to na thī

barbat-e-dard se ubhrī haiñ ye kis kī yādeñ

nāla-e-shab meñ kabhī naġhmagī aisī to na thī

tum ko kuchh yaad hai jab apnā banāyā thā mujhe

zindagī mere liye ajnabī aisī to na thī

bijliyāñ TuuT ke kyuuñ jaane nasheman pe girīñ

ḳhas-o-ḳhāshāk meñ kuchh dil-kashī aisī to na thī

maiñ sar-e-rāh khaḌā soch rahā huuñ ab tak

mujh meñ un meñ koī begāngī aisī to na thī

kitnī hī ḳhushiyoñ ke ḳhuuñ se bhī 'na.īmī' na bujhī

ġham ke hoñToñ pe kabhī tishnagī aisī to na thī

waqt ki dhaar mein tezi kabhi aisi to na thi

KHun mein ghaltida meri zindagi aisi to na thi

aarzu pahle mujhe maut ki aisi to na thi

dil ke aangan mein kabhi tirgi aisi to na thi

Dal denge mere kase mein wo KHud ko ek din

kabhi tasir sada mein meri aisi to na thi

kisi tufan ke ye aasar na hon dil walo

un nigahon mein kabhi KHamushi aisi to na thi

khinch di kis ne had-e-gham pe tabassum ki fasil

kucha-e-dard mein tabindagi aisi to na thi

kaun KHwabon ke gharaunde bhi mere toD gaya

thi magar mujh se unhen dushmani aisi to na thi

jaane kis dasht mein khoe gaye sare sae

dhup hangamon ki pahle kabhi aisi to na thi

barbat-e-dard se ubhri hain ye kis ki yaaden

nala-e-shab mein kabhi naghmagi aisi to na thi

tum ko kuchh yaad hai jab apna banaya tha mujhe

zindagi mere liye ajnabi aisi to na thi

bijliyan TuT ke kyun jaane nasheman pe girin

KHas-o-KHashak mein kuchh dil-kashi aisi to na thi

main sar-e-rah khaDa soch raha hun ab tak

mujh mein un mein koi begangi aisi to na thi

kitni hi KHushiyon ke KHun se bhi 'naimi' na bujhi

gham ke honTon pe kabhi tishnagi aisi to na thi