pani to kya jalan se main pyasa hawa ka tha

paanī to kyā jalan se maiñ pyāsā havā kā thā

ik aah bhī mire liye jhoñkā sabā kā thā

kuchh yuuñ kiran kiran meñ udāsī thī jis tarah

mahtāb bhī shabāb kisī be-navā kā thā

nargis sifat kisī ko na dikhlā sake magar

dāmān-e-dīd meñ koī manzar balā kā thā

the qarya qarya dil meñ ḳharābe base hue

jaise ye shahr bhī mire farmāñ-ravā kā thā

ab dast-o-pā ko 'ādat-e-zanjīr ho ga.ī

mushkil thā jis qadar bhī safar ibtidā kā thā

sadiyoñ se ham bhī sūrat-e-sahrā the tishna-kām

barsī vahīñ jidhar ko jhukāv ghaTā kā thā

jab maiñ chalā Dubo ke safīnā to mere yaar

us samt chal diye ki jidhar ruḳh havā kā thā

kaise kahūñ ki saarā zamāna saḳhī nahīñ

koī to jurm apne bhī dāmān-e-vā kā thā

thī dastaras na tere ḳham-e-zulf tak to kyā

ḳhush-bū kī tarh maiñ bhī musāfir havā kā thā

naġhme kī tarh mere laboñ par bikhar gayā

ḳhāmosh sā vo shaḳhs ki paikar hayā kā thā

yuuñ to tanāsub-e-lab-o-ruḳh bhī hai ḳhuub shai

ham jis pe mar miTe haiñ vo jaadū sadā kā thā

yuuñ to hazār shukr ki tū mil gayā magar

ye dukh ki dhyān tujh se bhī nāzuk-adā kā thā

qaaf

'sādiq' mizāj talḳh nasha tund rang tez

mānind-e-mai mu'āmla jins-e-vafā kā thā

firdaus kī fazā meñ bhī kam kam sukūñ milā

āñkheñ najaf kī jism mirā karbalā kā thā

pani to kya jalan se main pyasa hawa ka tha

ek aah bhi mere liye jhonka saba ka tha

kuchh yun kiran kiran mein udasi thi jis tarah

mahtab bhi shabab kisi be-nawa ka tha

nargis sifat kisi ko na dikhla sake magar

daman-e-did mein koi manzar bala ka tha

the qarya qarya dil mein KHarabe base hue

jaise ye shahr bhi mere farman-rawa ka tha

ab dast-o-pa ko 'adat-e-zanjir ho gai

mushkil tha jis qadar bhi safar ibtida ka tha

sadiyon se hum bhi surat-e-sahra the tishna-kaam

barsi wahin jidhar ko jhukaw ghaTa ka tha

jab main chala Dubo ke safina to mere yar

us samt chal diye ki jidhar ruKH hawa ka tha

kaise kahun ki sara zamana saKHi nahin

koi to jurm apne bhi daman-e-wa ka tha

thi dastaras na tere KHam-e-zulf tak to kya

KHush-bu ki tarh main bhi musafir hawa ka tha

naghme ki tarh mere labon par bikhar gaya

KHamosh sa wo shaKHs ki paikar haya ka tha

yun to tanasub-e-lab-o-ruKH bhi hai KHub shai

hum jis pe mar miTe hain wo jadu sada ka tha

yun to hazar shukr ki tu mil gaya magar

ye dukh ki dhyan tujh se bhi nazuk-ada ka tha

qaf

'sadiq' mizaj talKH nasha tund rang tez

manind-e-mai mu'amla jins-e-wafa ka tha

firdaus ki faza mein bhi kam kam sukun mila

aankhen najaf ki jism mera karbala ka tha