mere badan pe qaba-e-ana salamat thi

mire badan pe qabā-e-anā salāmat thī

buland thā mirā sar zindagī qayāmat thī

kisī ko mujh se mohabbat na thī 'ajab din the

ki jab usūloñ se apne mujhe mohabbat thī

lahū badan meñ na thā tel thā mashīnoñ kā

javān chehra thā aur ḳhaak jaisī rangat thī

kal us kī aañkh bhī nam ho ga.ī mire ġham par

ye 'umr bhar ke mire āñsuoñ kī qīmat thī

ḳhulūs baañT diyā nā-sipās logoñ meñ

yahī faqīr ke dāman meñ ek daulat thī

kanār-e-āb-e-ravāñ ik hujūm thā lekin

bachā.e Dūbte bachche ko kis meñ himmat thī

tavāf phūloñ kā chhoḌā chaman se hijrat kī

ye titliyoñ kī rivāyāt se baġhāvat thī

'kamāl' bād-e-ḳhizāñ oḌh kar haiñ ḳhvābīda

vo peḌ jin ko na.ī koñpaloñ kī hasrat thī

mere badan pe qaba-e-ana salamat thi

buland tha mera sar zindagi qayamat thi

kisi ko mujh se mohabbat na thi 'ajab din the

ki jab usulon se apne mujhe mohabbat thi

lahu badan mein na tha tel tha mashinon ka

jawan chehra tha aur KHak jaisi rangat thi

kal us ki aankh bhi nam ho gai mere gham par

ye 'umr bhar ke mere aansuon ki qimat thi

KHulus banT diya na-sipas logon mein

yahi faqir ke daman mein ek daulat thi

kanar-e-ab-e-rawan ek hujum tha lekin

bachae Dubte bachche ko kis mein himmat thi

tawaf phulon ka chhoDa chaman se hijrat ki

ye titliyon ki riwayat se baghawat thi

'kamal' baad-e-KHizan oDh kar hain KHwabida

wo peD jin ko nai konpalon ki hasrat thi