kuche mein un ke aae the kya hausla liye

kūche meñ un ke aa.e the kyā hausla liye

ab jā rahe haiñ dosh pe nā'sh-e-vafā liye

ehsās ke charāġh kabhī gar jalā liye

kuchh zulmatoñ ne aur bhī gesū baḌhā liye

vo Dagmagā chukā huuñ ki girne kī der hai

mauhūm āhaToñ se hī mujh ko sañbhāliye

nāsūr ḳhvāhishoñ ke na bhar jaa.eñ ye kahīñ

aaj aa.e haiñ vo marham-e-ashk-e-vafā liye

jiddat meñ bhī mirī hai rivāyat kī lai vahī

dariyā meñ bhī utartā huuñ maiñ aa.ina liye

be-gāngī kī dhuul hai aur nafratoñ kī dhuup

utre kahāñ tum aarzū kā qāfila liye

ye shahr-e-be-hisāñ hai sharar hai nazar nazar

ḳhāshāk-e-ārzū ko sar-e-rah na Dāliye

ab kyuuñ jalā rahe ho lab-o-ruḳh kī mash'aleñ

jab yaad ke darīchoñ pe parde girā liye

koī hadīs-e-marg-e-tabassum na sun sakā

martī rahī hayāt ġham-e-jāñ-guzā liye

yaaro kahīñ ho shīshe kī dīvār to batāo

muddat se phir rahā huuñ maiñ sang-e-sadā liye

ye pāgaloñ kī bhiiḌ 'na.īmī' kuchal na de

baiThā huuñ sub.h ko bhī sar-e-rah diyā liye

kuche mein un ke aae the kya hausla liye

ab ja rahe hain dosh pe na'sh-e-wafa liye

ehsas ke charagh kabhi gar jala liye

kuchh zulmaton ne aur bhi gesu baDha liye

wo Dagmaga chuka hun ki girne ki der hai

mauhum aahaTon se hi mujh ko sanbhaaliye

nasur KHwahishon ke na bhar jaen ye kahin

aaj aae hain wo marham-e-ashk-e-wafa liye

jiddat mein bhi meri hai riwayat ki lai wahi

dariya mein bhi utarta hun main aaina liye

be-gangi ki dhul hai aur nafraton ki dhup

utre kahan tum aarzu ka qafila liye

ye shahr-e-be-hisan hai sharar hai nazar nazar

KHashak-e-arzu ko sar-e-rah na Daliye

ab kyun jala rahe ho lab-o-ruKH ki mash'alen

jab yaad ke darichon pe parde gira liye

koi hadis-e-marg-e-tabassum na sun saka

marti rahi hayat gham-e-jaan-guza liye

yaro kahin ho shishe ki diwar to batao

muddat se phir raha hun main sang-e-sada liye

ye pagalon ki bhiD 'naimi' kuchal na de

baiTha hun subh ko bhi sar-e-rah diya liye