junun ne KHud se bhi be-zar kar diya hai mujhe

junūñ ne ḳhud se bhī be-zār kar diyā hai mujhe

maiñ achchhā ḳhāsā thā bīmār kar diyā hai mujhe

bhalā maiñ kaise rah-e-'ishq se bhaTak jā.ūñ

kisī ne pahle hī hushyār kar diyā hai mujhe

adab sikhāyā thā mujh ko to she'r-goī ne

mushā'iron ne adākār kar diyā hai mujhe

ab us ke kūche meñ jaane se fā.eda kyā hai

jab us ne milne se inkār kar diyā hai mujhe

vo jis ke pyaar meñ dīvāna ho gayā huuñ maiñ

usī ne ziist se bezār kar diyā hai mujhe

'ajīb nashsha sā taarī hai zehn-o-dil pe mire

kisī ke husn ne sarshār kar diyā hai mujhe

jhukā huā hai mirā jis kī bārgāh meñ sar

usī ne sāhab-e-dastār kar diyā hai mujhe

mirī anā kī is āvāz ne hī ai 'najmī'

mire ḳhilāf ka.ī baar kar diyā hai mujhe

junun ne KHud se bhi be-zar kar diya hai mujhe

main achchha KHasa tha bimar kar diya hai mujhe

bhala main kaise rah-e-'ishq se bhaTak jaun

kisi ne pahle hi hushyar kar diya hai mujhe

adab sikhaya tha mujh ko to she'r-goi ne

musha'iron ne adakar kar diya hai mujhe

ab us ke kuche mein jaane se faeda kya hai

jab us ne milne se inkar kar diya hai mujhe

wo jis ke pyar mein diwana ho gaya hun main

usi ne zist se bezar kar diya hai mujhe

'ajib nashsha sa tari hai zehn-o-dil pe mere

kisi ke husn ne sarshaar kar diya hai mujhe

jhuka hua hai mera jis ki bargah mein sar

usi ne sahab-e-dastar kar diya hai mujhe

meri ana ki is aawaz ne hi ai 'najmi'

mere KHilaf kai bar kar diya hai mujhe