dil lagane ka natija sochna mushkil na tha

dil lagāne kā natīja sochnā mushkil na thā

baat itnī thī 'qamar' dilbar se pyārā dil na thā

zabt-e-ġham kī diqqateñ ham ġham-zadoñ se pūchhiye

aap ne to keh diyā āsān thā mushkil na thā

dil rahā pahlū meñ jab tak dil ke vo dushman rahe

dil-navāzī kā unheñ jab dhyān aayā dil na thā

rasm un se rabt un se dost vo ham-rāz vo

ġhair sab qābil the goyā maiñ kisī qābil na thā

māne'-e-dīdār-e-lailā jis ko samjhā qais ne

sirf ro'b-e-husn thā vo parda-e-mahmil na thā

hijr meñ jī par hamāre ban ga.ī achchhā huā

chhuT ga.e jab tum to phir jiine se kuchh hāsil na thā

dil lagane ka natija sochna mushkil na tha

baat itni thi 'qamar' dilbar se pyara dil na tha

zabt-e-gham ki diqqaten hum gham-zadon se puchhiye

aap ne to keh diya aasan tha mushkil na tha

dil raha pahlu mein jab tak dil ke wo dushman rahe

dil-nawazi ka unhen jab dhyan aaya dil na tha

rasm un se rabt un se dost wo ham-raaz wo

ghair sab qabil the goya main kisi qabil na tha

mane'-e-didar-e-laila jis ko samjha qais ne

sirf ro'b-e-husn tha wo parda-e-mahmil na tha

hijr mein ji par hamare ban gai achchha hua

chhuT gae jab tum to phir jine se kuchh hasil na tha