devta ki tarah har aankh ka tara hote

devtā kī tarah har aañkh kā taarā hote

ham agar jism nahīñ jism kā saayā hote

tum ne achchhā kiyā jo aañkh milā kar kī baat

varna kyā jaane gumāñ logoñ ko kyā kyā hote

dhuup meñ soch kī muddat se khaḌā jaltā huuñ

kaash tum abr kā chhoTā hī sā TukḌā hote

mere ashkoñ ke sitāre na agar hote rafīq

jalte sūraj kī tarah aap bhī tanhā hote

maiñ ye sab dukh nazar-andāz hī kar detā agar

tum mire dost nahīñ sirf shanāsā hote

bar to aa jaatī kabhī shauq ke dāman kī murād

tum agar phuul na hote koī kāñTā hote

vus'ateñ to thiiñ bahar-hāl muqaddar apnā

ham samundar na agar hote to sahrā hote

har varaq par to bikharne se ye behtar thā ki ham

un kī āñkhoñ se Tapaktā vo fasānā hote

koh-o-sahrā meñ bhī gūñje to kisī ne na sunā

kyā burā.ī thī agar sāz-e-shikasta hote

rote rote mujhe kal aaya qafas meñ ye ḳhayāl

jaane kyā hotā jo aañsū kahīñ sho'la hote

keh to sakte hai 'na.īmī' kā bhī duniyā meñ koī

kam se kam tum mirā jhūTā hī sahārā hote

dewta ki tarah har aankh ka tara hote

hum agar jism nahin jism ka saya hote

tum ne achchha kiya jo aankh mila kar ki baat

warna kya jaane guman logon ko kya kya hote

dhup mein soch ki muddat se khaDa jalta hun

kash tum abr ka chhoTa hi sa TukDa hote

mere ashkon ke sitare na agar hote rafiq

jalte suraj ki tarah aap bhi tanha hote

main ye sab dukh nazar-andaz hi kar deta agar

tum mere dost nahin sirf shanasa hote

bar to aa jati kabhi shauq ke daman ki murad

tum agar phul na hote koi kanTa hote

wus'aten to thin bahar-haal muqaddar apna

hum samundar na agar hote to sahra hote

har waraq par to bikharne se ye behtar tha ki hum

un ki aankhon se Tapakta wo fasana hote

koh-o-sahra mein bhi gunje to kisi ne na suna

kya burai thi agar saz-e-shikasta hote

rote rote mujhe kal aaya qafas mein ye KHayal

jaane kya hota jo aansu kahin sho'la hote

keh to sakte hai 'naimi' ka bhi duniya mein koi

kam se kam tum mera jhuTa hi sahaara hote