charagh-e-dard bujhao ki raat KHatm hui

charāġh-e-dard bujhāo ki raat ḳhatm huī

ab ek baat chalī ek baat ḳhatm huī

'urūs-e-sub.h ko ashkoñ ke haar pahnāo

hazāroñ taare bujhe haiñ to raat ḳhatm huī

ab ashk-e-ḳhūñ se adā kar rahā huuñ kaffāra

vo qahqahoñ se khanaktī hayāt ḳhatm huī

ḳhamoshiyoñ ko banāyā hai mudda'ā jab se

suḳhan-tarāz nigāhoñ kī baat ḳhatm huī

na jaane soch ke kyā maiñ ne ḳhud-kushī kī thī

bujhī na sham' na ye kā.enāt ḳhatm huī

ye ittifāq bhī merī taraf ishāra hai

chalī guloñ se to kāñToñ pe baat ḳhatm huī

haram se ḳhair-minan-naum kī sadā aa.ī

uTho uTho ki shab-e-somnāt ḳhatm huī

salīb laao payambar huuñ maiñ mohabbat kā

lagāo aag ki paanī kī baat ḳhatm huī

masal ke phuul 'na.īmī' manāo jashn-e-bahār

vo ehtirām-e-gulistāñ kī baat ḳhatm huī

charagh-e-dard bujhao ki raat KHatm hui

ab ek baat chali ek baat KHatm hui

'urus-e-subh ko ashkon ke haar pahnao

hazaron tare bujhe hain to raat KHatm hui

ab ashk-e-KHun se ada kar raha hun kaffara

wo qahqahon se khanakti hayat KHatm hui

KHamoshiyon ko banaya hai mudda'a jab se

suKHan-taraaz nigahon ki baat KHatm hui

na jaane soch ke kya main ne KHud-kushi ki thi

bujhi na sham' na ye kaenat KHatm hui

ye ittifaq bhi meri taraf ishaara hai

chali gulon se to kanTon pe baat KHatm hui

haram se KHair-minan-naum ki sada aai

uTho uTho ki shab-e-somnat KHatm hui

salib lao payambar hun main mohabbat ka

lagao aag ki pani ki baat KHatm hui

masal ke phul 'naimi' manao jashn-e-bahaar

wo ehtiram-e-gulistan ki baat KHatm hui