aashiq the magar sahib-e-dastar rahe hain

'āshiq the magar sāhib-e-dastār rahe haiñ

ham apne qabīle ke bhī sardār rahe haiñ

qīmat na batāo hameñ ḳhush-bū kī ki ham log

har qism ke phūloñ ke ḳharīdār rahe haiñ

muddat huī ik ḳhvāb bhī dekhā nahīñ ham ne

'arsa huā ham so ke bhī bedār rahe haiñ

ham apnī kahānī ke hī kirdār nahīñ the

ham terī kahānī ke bhī kirdār rahe haiñ

tujh se kabhī māñgā na mohabbat kā sila tak

bas terī mohabbat ke gunahgār rahe haiñ

ham sāmne aa kar bhī na aa.e sar-e-manzar

dīvār ke aage pas-e-dīvār rahe haiñ

duniyā kā koī raaz na pā kar bhī hamesha

duniyā kī nigāhoñ meñ pur-asrār rahe haiñ

ham log zamānat pe rihā ho nahīñ sakte

ham log jo āñkhoñ ke giraftār rahe haiñ

duniyā kī nazar meñ to rahe kaam ke 'faisal'

bas terī nazar meñ hī to be-kār rahe haiñ

'ashiq the magar sahib-e-dastar rahe hain

hum apne qabile ke bhi sardar rahe hain

qimat na batao hamein KHush-bu ki ki hum log

har qism ke phulon ke KHaridar rahe hain

muddat hui ek KHwab bhi dekha nahin hum ne

'arsa hua hum so ke bhi bedar rahe hain

hum apni kahani ke hi kirdar nahin the

hum teri kahani ke bhi kirdar rahe hain

tujh se kabhi manga na mohabbat ka sila tak

bas teri mohabbat ke gunahgar rahe hain

hum samne aa kar bhi na aae sar-e-manzar

diwar ke aage pas-e-diwar rahe hain

duniya ka koi raaz na pa kar bhi hamesha

duniya ki nigahon mein pur-asrar rahe hain

hum log zamanat pe riha ho nahin sakte

hum log jo aankhon ke giraftar rahe hain

duniya ki nazar mein to rahe kaam ke 'faisal'

bas teri nazar mein hi to be-kar rahe hain