aankhon se KHwab lab se hansi chhin li gai

āñkhoñ se ḳhvāb lab se hañsī chhīn lī ga.ī

har chand mujh se merī ḳhushī chhīn lī ga.ī

rāhat to zindagī ke masā.il meñ ghir ga.ī

phir zindagī hī baaqī bachī chhīn lī ga.ī

ḳhāmoshiyoñ ko ham ne muqaddar samajh liyā

jab se hamārī tishna-labī chhīn lī ga.ī

mahrūm rakh ke 'ilm se nasl-e-jadīd ko

ham se hamārī ek sadī chhīn lī ga.ī

chāhā thā muskurāne kā iz.hār ham kareñ

aisī sazā milī ki hañsī chhīn lī ga.ī

kyuuñ haiñ tamāsh-bīnoñ meñ har zulm dekh kar

ġhairat ke saath zinda-dilī chhīn lī ga.ī

duniyā hai kis fareb-e-hikāyat meñ mubtalā

āvāz yā ki dīda-varī chhīn lī ga.ī

kuchh aur zindagī ke masā.il bhī baḌh ga.e

jab se 'habīb' sāda-dilī chhīn lī ga.ī

aankhon se KHwab lab se hansi chhin li gai

har chand mujh se meri KHushi chhin li gai

rahat to zindagi ke masail mein ghir gai

phir zindagi hi baqi bachi chhin li gai

KHamoshiyon ko hum ne muqaddar samajh liya

jab se hamari tishna-labi chhin li gai

mahrum rakh ke 'ilm se nasl-e-jadid ko

hum se hamari ek sadi chhin li gai

chaha tha muskurane ka izhaar hum karen

aisi saza mili ki hansi chhin li gai

kyun hain tamash-binon mein har zulm dekh kar

ghairat ke sath zinda-dili chhin li gai

duniya hai kis fareb-e-hikayat mein mubtala

aawaz ya ki dida-wari chhin li gai

kuchh aur zindagi ke masail bhi baDh gae

jab se 'habib' sada-dili chhin li gai