mahrum-e-tarab hai dil-e-dil-gir abhi tak

mahrūm-e-tarab hai dil-e-dil-gīr abhī tak

baaqī hai tire ishq kī tāsīr abhī tak

vasl us but-e-bad-ḳhū kā mayassar nahīñ hotā

vābasta-e-taqdīr hai tadbīr abhī tak

ik baar sunī thī so mire dil meñ hai maujūd

ai jān-e-tamannā tirī taqrīr abhī tak

sīkhī thī jo āġhāz-e-mohabbat meñ qalam ne

baaqī hai vo rañgīni-e-tahrīr abhī tak

is darja na betāb ho ai shauq-e-shahādat

hai miyān meñ us shoḳh kī shamshīr abhī tak

kahne ko to maiñ bhuul gayā huuñ magar ai yaar

hai ḳhāna-e-dil meñ tirī tasvīr abhī tak

bhūlī nahīñ dil ko tirī duzdīda-nigāhī

pahlū meñ hai kuchh kuchh ḳhalish-e-tīr abhī tak

the haq pe vo be-shak ki na hote to na hotā

duniyā meñ bapā mātam-e-'shabbīr' abhī tak

guzre bahut ustād magar rañg-e-asar meñ

be-misl hai 'hasrat' suḳhan-e-'mīr' abhī tak

mahrum-e-tarab hai dil-e-dil-gir abhi tak

baqi hai tere ishq ki tasir abhi tak

wasl us but-e-bad-KHu ka mayassar nahin hota

wabasta-e-taqdir hai tadbir abhi tak

ek bar suni thi so mere dil mein hai maujud

ai jaan-e-tamanna teri taqrir abhi tak

sikhi thi jo aaghaz-e-mohabbat mein qalam ne

baqi hai wo rangini-e-tahrir abhi tak

is darja na betab ho ai shauq-e-shahadat

hai miyan mein us shoKH ki shamshir abhi tak

kahne ko to main bhul gaya hun magar ai yar

hai KHana-e-dil mein teri taswir abhi tak

bhuli nahin dil ko teri duzdida-nigahi

pahlu mein hai kuchh kuchh KHalish-e-tir abhi tak

the haq pe wo be-shak ki na hote to na hota

duniya mein bapa matam-e-'shabbir' abhi tak

guzre bahut ustad magar rang-e-asar mein

be-misl hai 'hasrat' suKHan-e-'mir' abhi tak