mana kisi zalim ki himayat nahin karte

maanā kisī zālim kī himāyat nahīñ karte

ham log magar khul ke baġhāvat nahīñ karte

karte haiñ musalsal mire īmān pe tanqīd

ḳhud apne aqīdoñ kī vazāhat nahīñ karte

kuchh vo bhī tabī.at kā sukhī aisā nahīñ hai

kuchh ham bhī mohabbat meñ qanā.at nahīñ karte

jo zaḳhm diye aap ne mahfūz haiñ ab tak

aadat hai amānat meñ ḳhayānat nahīñ karte

kyuuñ in ko milā mansab-e-afzā.ish-e-gītī

ye log to miTTī se mohabbat nahīñ karte

kuchh aisī baġhāvat hai tabī.at meñ hamārī

jis baat kī hotī hai ijāzat nahīñ karte

tanzīm kā ye haal hai is shahr meñ 'āsim'

be-sāḳhta bachche bhī sharārat nahīñ karte

mana kisi zalim ki himayat nahin karte

hum log magar khul ke baghawat nahin karte

karte hain musalsal mere iman pe tanqid

KHud apne aqidon ki wazahat nahin karte

kuchh wo bhi tabiat ka sukhi aisa nahin hai

kuchh hum bhi mohabbat mein qanaat nahin karte

jo zaKHm diye aap ne mahfuz hain ab tak

aadat hai amanat mein KHayanat nahin karte

kyun in ko mila mansab-e-afzaish-e-giti

ye log to miTTi se mohabbat nahin karte

kuchh aisi baghawat hai tabiat mein hamari

jis baat ki hoti hai ijazat nahin karte

tanzim ka ye haal hai is shahr mein 'asim'

be-saKHta bachche bhi shararat nahin karte