logo hum chhan chuke ja ke samundar sare

logo ham chhān chuke jā ke samundar saare

us ne muTThī meñ chhupā rakkhe haiñ gauhar saare

zaḳhm-e-dil jaag uThe phir vahī din yaar aa.e

phir tasavvur pe ubhar aa.e vo manzar saare

tishnagī merī ajab ret kā manzar niklī

mere hoñToñ pe hue ḳhushk samundar saare

us ko ġhamgīn jo paayā to maiñ kuchh kah na sakā

bujh ga.e mere dahakte hue tevar saare

āgahī karb vafā sabr tamannā ehsās

mere hī siine meñ utre haiñ ye ḳhanjar saare

dosto tum ne jo pheñke the mire āñgan meñ

lag ga.e ghar kī fasīloñ meñ vo patthar saare

ḳhūn-e-dil aur nahīñ rañg-e-hinā aur nahīñ

ek hī rañg meñ haiñ shahr ke manzar saare

qatl-gah meñ ye charāġhāñ hai mire dam se 'bashīr'

mujh ko dekhā to chamakne lage ḳhanjar saare

logo hum chhan chuke ja ke samundar sare

us ne muTThi mein chhupa rakkhe hain gauhar sare

zaKHm-e-dil jag uThe phir wahi din yar aae

phir tasawwur pe ubhar aae wo manzar sare

tishnagi meri ajab ret ka manzar nikli

mere honTon pe hue KHushk samundar sare

us ko ghamgin jo paya to main kuchh kah na saka

bujh gae mere dahakte hue tewar sare

aagahi karb wafa sabr tamanna ehsas

mere hi sine mein utre hain ye KHanjar sare

dosto tum ne jo phenke the mere aangan mein

lag gae ghar ki fasilon mein wo patthar sare

KHun-e-dil aur nahin rang-e-hina aur nahin

ek hi rang mein hain shahr ke manzar sare

qatl-gah mein ye charaghan hai mere dam se 'bashir'

mujh ko dekha to chamakne lage KHanjar sare