dikhawe ki mohabbat se sunahre pal nahin aate

dikhāve kī mohabbat se sunahre pal nahīñ aate

kabhī bhī jhuuT kī Daalī pe sachche phal nahīñ aate

sabhī ke faiz kī ḳhātir hī ye barsāt hotī hai

kisī kī chār-dīvārī meñ to bādal nahīñ aate

mirī kaḌvī zabāñ se tum mirī pahchān mat karnā

mujhe ġhussa to aatā hai magar chhal val nahīñ aate

tumheñ milne kī ḳhvāhish hī yahāñ tak khīñch laatī hai

vagarna kaun jaatā hai jahāñ signal nahīñ aate

tirī yādoñ ne is dil ko kuchh aise bāñdh rakkhā hai

akele bhī agar dauḌeñ to ham avval nahīñ aate

yahāñ baiTho hamāre paas meñ bāteñ karo ham se

chale jaate haiñ jo ik baar phir vo pal nahīñ aate

agar hal jānte ho phir tumheñ ye mushkileñ kyā haiñ

unhī ko diqqateñ hotī haiñ jin ko hal nahīñ aate

satānā be-zabānoñ ko tumheñ bhārī na paḌ jaa.e

tumhāre rāstoñ meñ kyā kabhī jangal nahīñ aate

ka.ī hushyār aate haiñ hameñ pāgal banāne ko

hamesha pāgaloñ ke bhes meñ pāgal nahīñ aate

bahū beTī hamārī rizq ko māthe lagātī hai

hamāre paaoñ ke nīche kabhī chāval nahīñ aate

kisī kā martaba koī bhī kaise chhīn saktā hai

hare hote bhī haiñ to sabziyoñ meñ phal nahīñ aate

pahan ke ham inheñ bachpan tire kūche meñ aa jaate

magar ab paaoñ meñ chhoTe se ye chappal nahīñ aate

dikhawe ki mohabbat se sunahre pal nahin aate

kabhi bhi jhuT ki Dali pe sachche phal nahin aate

sabhi ke faiz ki KHatir hi ye barsat hoti hai

kisi ki chaar-diwari mein to baadal nahin aate

meri kaDwi zaban se tum meri pahchan mat karna

mujhe ghussa to aata hai magar chhal wal nahin aate

tumhein milne ki KHwahish hi yahan tak khinch lati hai

wagarna kaun jata hai jahan signal nahin aate

teri yaadon ne is dil ko kuchh aise bandh rakkha hai

akele bhi agar dauDen to hum awwal nahin aate

yahan baiTho hamare pas mein baaten karo hum se

chale jate hain jo ek bar phir wo pal nahin aate

agar hal jaante ho phir tumhein ye mushkilen kya hain

unhi ko diqqaten hoti hain jin ko hal nahin aate

satana be-zabanon ko tumhein bhaari na paD jae

tumhaare raston mein kya kabhi jangal nahin aate

kai hushyar aate hain hamein pagal banane ko

hamesha pagalon ke bhes mein pagal nahin aate

bahu beTi hamari rizq ko mathe lagati hai

hamare paon ke niche kabhi chawal nahin aate

kisi ka martaba koi bhi kaise chhin sakta hai

hare hote bhi hain to sabziyon mein phal nahin aate

pahan ke hum inhen bachpan tere kuche mein aa jate

magar ab paon mein chhoTe se ye chappal nahin aate