lauTe kuchh is tarah teri jalwa-sara se hum

lauTe kuchh is tarah tirī jalva-sarā se ham

bante ga.e qadam-ba-qadam aa.ina se ham

is darja pā.emāl na hote jafā se ham

luuTe ga.e siyāsat-e-mehr-o-vafā se ham

baaqī hī kyā rahā hai tujhe māñgne ke baad

bas ik duā meñ chhūT ga.e har duā se ham

dekhī ga.ī na ham se shikast-e-ġhurūr-e-husn

sharmā ga.e irāda-e-tark-e-vafā se ham

ye kyā kahā junūñ hai mohabbat kī intihā

ai be-ḳhabar chale haiñ isī intihā se ham

maanā ki dil ko tere na milne kā ġham rahā

sad shukr bach ga.e talab-e-mā-sivā se ham

lauTe kuchh is tarah teri jalwa-sara se hum

bante gae qadam-ba-qadam aaina se hum

is darja paemal na hote jafa se hum

luTe gae siyasat-e-mehr-o-wafa se hum

baqi hi kya raha hai tujhe mangne ke baad

bas ek dua mein chhuT gae har dua se hum

dekhi gai na hum se shikast-e-ghurur-e-husn

sharma gae irada-e-tark-e-wafa se hum

ye kya kaha junun hai mohabbat ki intiha

ai be-KHabar chale hain isi intiha se hum

mana ki dil ko tere na milne ka gham raha

sad shukr bach gae talab-e-ma-siwa se hum