lapaT si dagh kuhan ki taraf se aati hai

lapaT sī daaġh kuhan kī taraf se aatī hai

jab ik havā tire tan kī taraf se aatī hai

maiñ terī manzil-e-jāñ tak pahuñch to saktā huñ

magar ye raah badan kī taraf se aatī hai

ye mushk hai ki mohabbat mujhe nahīñ ma.alūm

mahak sī mere hiran kī taraf se aatī hai

pahāḌ chup haiñ to ab reg-zār bolte haiñ

nidā-e-koh ḳhutan kī taraf se aatī hai

kisī ke vāda-e-fardā ke barg-o-bār kī ḳhair

ye aag hijr ke ban kī taraf se aatī hai

jugoñ ke kho.e huoñ ko pukārtā hai ye kaun

sadā to ḳhāk-e-vatan kī taraf se aatī hai

lapaT si dagh kuhan ki taraf se aati hai

jab ek hawa tere tan ki taraf se aati hai

main teri manzil-e-jaan tak pahunch to sakta hun

magar ye rah badan ki taraf se aati hai

ye mushk hai ki mohabbat mujhe nahin malum

mahak si mere hiran ki taraf se aati hai

pahaD chup hain to ab reg-zar bolte hain

nida-e-koh KHutan ki taraf se aati hai

kisi ke wada-e-farda ke barg-o-bar ki KHair

ye aag hijr ke ban ki taraf se aati hai

jugon ke khoe huon ko pukarta hai ye kaun

sada to KHak-e-watan ki taraf se aati hai