kursi-e-dil pe tere jate hi dard aa baiThe

kursī-e-dil pe tire jaate hī dard aa baiThe

jaise ā.īna-e-be-kār pe gard aa baiThe

pahlī manzil pe hī Takrā ke gire duniyā se

paañv tuḌvā ke tamām ahl-e-navard aa baiThe

dāvat-e-dīd jo us qāmat-e-rañgīñ kī milī

bazm meñ ham bhī liye ye ruḳh-e-zard aa baiThe

aurteñ kaam pe niklī thiiñ badan ghar rakh kar

jism ḳhālī jo nazar aa.e to mard aa baiThe

shahr ik samt se jañgal sā nazar aane lagā

shahr ke dil meñ bhī kyā dasht-navard aa baiThe

'farhat-ehsās' kī ta.azīm meñ uTThā thā samāj

aur vo us kī jagah sūrat-e-fard aa baiThe

kursi-e-dil pe tere jate hi dard aa baiThe

jaise aaina-e-be-kar pe gard aa baiThe

pahli manzil pe hi Takra ke gire duniya se

panw tuDwa ke tamam ahl-e-naward aa baiThe

dawat-e-did jo us qamat-e-rangin ki mili

bazm mein hum bhi liye ye ruKH-e-zard aa baiThe

aurten kaam pe nikli thin badan ghar rakh kar

jism KHali jo nazar aae to mard aa baiThe

shahr ek samt se jangal sa nazar aane laga

shahr ke dil mein bhi kya dasht-naward aa baiThe

'farhat-ehsas' ki tazim mein uTTha tha samaj

aur wo us ki jagah surat-e-fard aa baiThe