kuchh log jo sawar hain kaghaz ki naw par

kuchh log jo savār haiñ kāġhaz kī naav par

tohmat tarāshte haiñ havā ke dabāv par

mausam hai sard-mehr lahū hai jamāv par

chaupāl chup hai bhiiḌ lagī hai alaav par

sab chāñdnī se ḳhush haiñ kisī ko ḳhabar nahīñ

phāhā hai māhtāb kā gardūñ ke ghaav par

ab vo kisī bisāt kī fehrist meñ nahīñ

jin manchaloñ ne jaan lagā dī thī daav par

sūraj ke sāmne haiñ na.e din ke marhale

ab raat jā chukī hai guzishta paḌāv par

gul-dān par hai naram savere kī zard dhuup

halqa banā hai kāñptī kirnoñ kā ghaav par

yuuñ ḳhud-farebiyoñ meñ safar ho rahā hai tai

baiThe haiñ pul pe aur nazar hai bahāv par

mausam se saaz ġhairat-e-gulshan se be-niyāz

hairat hai mujh ko apne chaman ke subhāv par

kyā daur hai ki marham-e-zañgār kī jagah

ab chāra-gar sharāb chhiḌakte haiñ ghaav par

tājir yahāñ agar haiñ yahī ġhairat-e-yahūd

paanī bikegā ḳhūn-e-shahīdāñ ke bhaav par

pahle kabhī rivāj banī thī na be-hisī

nādim bigāḌ par haiñ na ḳhush meñ banāv par

har rañg se payām utarte haiñ ruuh meñ

paḌtī hai jab nigāh dhanak ke jhukāv par

'dānish' mire sharīk-e-safar haiñ vo kaj-mizāj

sāhil ne jin ko pheñk diyā hai bahāv par

kuchh log jo sawar hain kaghaz ki naw par

tohmat tarashte hain hawa ke dabaw par

mausam hai sard-mehr lahu hai jamaw par

chaupal chup hai bhiD lagi hai alaw par

sab chandni se KHush hain kisi ko KHabar nahin

phaha hai mahtab ka gardun ke ghaw par

ab wo kisi bisat ki fehrist mein nahin

jin manchalon ne jaan laga di thi daw par

suraj ke samne hain nae din ke marhale

ab raat ja chuki hai guzishta paDaw par

gul-dan par hai naram sawere ki zard dhup

halqa bana hai kanpti kirnon ka ghaw par

yun KHud-farebiyon mein safar ho raha hai tai

baiThe hain pul pe aur nazar hai bahaw par

mausam se saz ghairat-e-gulshan se be-niyaz

hairat hai mujh ko apne chaman ke subhaw par

kya daur hai ki marham-e-zangar ki jagah

ab chaara-gar sharab chhiDakte hain ghaw par

tajir yahan agar hain yahi ghairat-e-yahud

pani bikega KHun-e-shahidan ke bhaw par

pahle kabhi riwaj bani thi na be-hisi

nadim bigaD par hain na KHush mein banaw par

har rang se payam utarte hain ruh mein

paDti hai jab nigah dhanak ke jhukaw par

'danish' mere sharik-e-safar hain wo kaj-mizaj

sahil ne jin ko phenk diya hai bahaw par