kuchh aur akele hue hum ghar se nikal kar

kuchh aur akele hue ham ghar se nikal kar

ye lahr kahāñ jaa.e samundar se nikal kar

mā'lūm thā milnā tirā mumkin nahīñ lekin

chāhā thā tujhe maiñ ne muqaddar se nikal kar

'ālam meñ ka.ī aur bhī 'ālam the so maiñ ne

dekhā nahīñ is markaz o mehvar se nikal kar

ab dekhiye kis shaḳhs kā ham-dosh bane vo

jhoñke kī tarah mere barābar se nikal kar

ḳhvāhish hai ki ḳhud ko bhī kabhī duur se dekhūñ

manzar kā nazāra karūñ manzar se nikal kar

taktā rahā maiñ us kī mubāraz-talabī ko

vo mujh se laḌā thā mire lashkar se nikal kar

kuchh aur akele hue hum ghar se nikal kar

ye lahr kahan jae samundar se nikal kar

ma'lum tha milna tera mumkin nahin lekin

chaha tha tujhe main ne muqaddar se nikal kar

'alam mein kai aur bhi 'alam the so main ne

dekha nahin is markaz o mehwar se nikal kar

ab dekhiye kis shaKHs ka ham-dosh bane wo

jhonke ki tarah mere barabar se nikal kar

KHwahish hai ki KHud ko bhi kabhi dur se dekhun

manzar ka nazara karun manzar se nikal kar

takta raha main us ki mubaraz-talabi ko

wo mujh se laDa tha mere lashkar se nikal kar