koi ye kah de gulshan gulshan

koī ye kah de gulshan gulshan

laakh balā.eñ ek nasheman

qātil rahbar qātil rahzan

dil sā dost na dil sā dushman

phuul khile haiñ gulshan gulshan

lekin apnā apnā dāman

ishq hai pyāre khel nahīñ hai

ishq hai kāre-shīsha-o-āhan

ḳhair mizāj-e-husn kī yā-rab

tez bahut hai dil kī dhaḌkan

aa ki na jaane tujh bin kab se

ruuh hai lāsha jism hai madfan

aaj na jaane raaz ye kyā hai

hijr kī raat aur itnī raushan

umreñ bītīñ sadiyāñ guzrīñ

hai vahī ab tak ishq kā bachpan

tujh sā hasīñ aur ḳhūn-e-mohabbat

vahm hai shāyad surḳhi-e-dāman

barq-e-havādis allāh allāh

jhuum rahī hai shāḳh-e-nasheman

tū ne sulajh kar gesū-e-jānāñ

aur baḌhā dī shauq kī uljhan

rahmat hogī tālib-e-isyāñ

rashk karegī pākī-e-dāman

dil ki mujassam ā.īna-sāmāñ

aur vo zālim ā.īna-dushman

baiThe ham har bazm meñ lekin

jhaaḌ ke uTThe apnā dāman

hastī-e-shā.er allāh allāh

husn kī manzil ishq kā maskan

rañgīñ fitrat saada tabī.at

farsh-nashīñ aur arsh-nasheman

kaam adhūrā aur āzādī

naam baḌe aur thoḌe darshan

sham.a hai lekin dhuñdlī dhu.dlī

saayā hai lekin raushan raushan

kāñToñ kā bhī haq hai kuchh āḳhir

kaun chhuḌā.e apnā dāman

chaltī phirtī chhāñv hai pyāre

kis kā sahrā kaisā gulshan

koi ye kah de gulshan gulshan

lakh balaen ek nasheman

qatil rahbar qatil rahzan

dil sa dost na dil sa dushman

phul khile hain gulshan gulshan

lekin apna apna daman

ishq hai pyare khel nahin hai

ishq hai kare-shisha-o-ahan

KHair mizaj-e-husn ki ya-rab

tez bahut hai dil ki dhaDkan

aa ki na jaane tujh bin kab se

ruh hai lasha jism hai madfan

aaj na jaane raaz ye kya hai

hijr ki raat aur itni raushan

umren bitin sadiyan guzrin

hai wahi ab tak ishq ka bachpan

tujh sa hasin aur KHun-e-mohabbat

wahm hai shayad surKHi-e-daman

barq-e-hawadis allah allah

jhum rahi hai shaKH-e-nasheman

tu ne sulajh kar gesu-e-jaanan

aur baDha di shauq ki uljhan

rahmat hogi talib-e-isyan

rashk karegi paki-e-daman

dil ki mujassam aaina-saman

aur wo zalim aaina-dushman

baiThe hum har bazm mein lekin

jhaD ke uTThe apna daman

hasti-e-shaer allah allah

husn ki manzil ishq ka maskan

rangin fitrat sada tabiat

farsh-nashin aur arsh-nasheman

kaam adhura aur aazadi

nam baDe aur thoDe darshan

shama hai lekin dhundli dhudli

saya hai lekin raushan raushan

kanTon ka bhi haq hai kuchh aaKHir

kaun chhuDae apna daman

chalti phirti chhanw hai pyare

kis ka sahra kaisa gulshan