koi nahin tha mere muqabil bhi main hi tha

koī nahīñ thā mere muqābil bhī maiñ hī thā

shāyad ki apnī raah meñ haa.il bhī maiñ hī thā

apne hī gird maiñ ne kiyā umr bhar safar

bhaTkāyā mujh ko jis ne vo manzil bhī maiñ hī thā

ubhrā huuñ jin se bār-hā mujh meñ the sab bhañvar

Duubā jahāñ pahuñch ke vo sāhil bhī maiñ hī thā

āsāñ nahīñ thā sāzisheñ karnā mire ḳhilāf

jab apnī ārzūoñ kā qātil bhī maiñ hī thā

shab bhar har ik ḳhayāl muḳhātib mujhī se thā

tanhā.iyoñ meñ raunaq-e-mahfil bhī maiñ hī thā

duniyā se be-niyāzī bhī fitrat mirī hī thī

duniyā ke ranj o dard meñ shāmil bhī maiñ hī thā

mujh ko samajh na paa.ī mirī zindagī kabhī

āsāniyāñ mujhī se thiiñ mushkil bhī maiñ hī thā

mujh meñ thā ḳhair o shar kā ajab imtizāj 'shād'

maiñ ḳhud hī haq-parast thā bātil bhī maiñ hī thā

koi nahin tha mere muqabil bhi main hi tha

shayad ki apni rah mein hail bhi main hi tha

apne hi gird main ne kiya umr bhar safar

bhaTkaya mujh ko jis ne wo manzil bhi main hi tha

ubhra hun jin se bar-ha mujh mein the sab bhanwar

Duba jahan pahunch ke wo sahil bhi main hi tha

aasan nahin tha sazishen karna mere KHilaf

jab apni aarzuon ka qatil bhi main hi tha

shab bhar har ek KHayal muKHatib mujhi se tha

tanhaiyon mein raunaq-e-mahfil bhi main hi tha

duniya se be-niyazi bhi fitrat meri hi thi

duniya ke ranj o dard mein shamil bhi main hi tha

mujh ko samajh na pai meri zindagi kabhi

aasaniyan mujhi se thin mushkil bhi main hi tha

mujh mein tha KHair o shar ka ajab imtizaj 'shad'

main KHud hi haq-parast tha baatil bhi main hi tha