kis ki aawaz kan mein aai

kis kī āvāz kaan meñ aa.ī

duur kī baat dhyān meñ aa.ī

aisī āzād ruuh is tan meñ

kyoñ purāne makān meñ aa.ī

aap aate rahe bulāte rahe

aane vaalī ik aan meñ aa.ī

haa.e kyā kyā nigāh bhaTkī hai

jab kabhī imtihān meñ aa.ī

ye kināra chalā ki naav chalī

kahiye kyā baat dhyān meñ aa.ī

ilm kyā ilm kī haqīqat kyā

jaisī jis ke gumān meñ aa.ī

kaun jaane nidā-e-haq kyā hai

kis ḳhudā kī zabān meñ aa.ī

aisī paa.e ḳhatā ki uf na kare

Dhiil jis kī zabān meñ aa.ī

husn kyā ḳhvāb se huā bedār

jaan taaza jahān meñ aa.ī

aap kī ye akaḌ are tauba

kab kisī naujavān meñ aa.ī

jān-levā hai ye chaḌhī tevrī

ye kashish kis kamān meñ aa.ī

baat adhūrī magar asar donā

achchhī luknat zabān meñ aa.ī

aañkh nīchī huī are ye kyā

kyoñ ġharaz darmiyān meñ aa.ī

maiñ payambar nahīñ 'yagānā' sahī

is se kyā kasr shaan meñ aa.ī

kis ki aawaz kan mein aai

dur ki baat dhyan mein aai

aisi aazad ruh is tan mein

kyon purane makan mein aai

aap aate rahe bulate rahe

aane wali ek aan mein aai

hae kya kya nigah bhaTki hai

jab kabhi imtihan mein aai

ye kinara chala ki naw chali

kahiye kya baat dhyan mein aai

ilm kya ilm ki haqiqat kya

jaisi jis ke guman mein aai

kaun jaane nida-e-haq kya hai

kis KHuda ki zaban mein aai

aisi pae KHata ki uf na kare

Dhil jis ki zaban mein aai

husn kya KHwab se hua bedar

jaan taza jahan mein aai

aap ki ye akaD are tauba

kab kisi naujawan mein aai

jaan-lewa hai ye chaDhi tewri

ye kashish kis kaman mein aai

baat adhuri magar asar dona

achchhi luknat zaban mein aai

aankh nichi hui are ye kya

kyon gharaz darmiyan mein aai

main payambar nahin 'yagana' sahi

is se kya kasr shan mein aai