ki nazar maine jab ehsas ke aaine mein

kī nazar maiñ ne jab ehsās ke ā.īne meñ

apnā dil paayā dhaḌaktā huā har siine meñ

muddateñ guzrīñ mulāqāt huī thī tum se

phir koī aur na aayā nazar ā.īne meñ

apne kāñdhoñ pe liye phirtā huuñ apnī hī salīb

ḳhud mirī maut kā mātam hai mire jiine meñ

apne andāz se andāza lagāyā sab ne

mujh ko yāroñ ne ġhalat kar liyā taḳhmīne meñ

apnī jānib nahīñ ab lauTnā mumkin merā

Dhal gayā huuñ maiñ sarāpā tire ā.īne meñ

ek lamhe ko hī aa jaa.e mayassar 'kaifī'

vo nazar jo mujhe dekhe mire ā.īne meñ

ki nazar main ne jab ehsas ke aaine mein

apna dil paya dhaDakta hua har sine mein

muddaten guzrin mulaqat hui thi tum se

phir koi aur na aaya nazar aaine mein

apne kandhon pe liye phirta hun apni hi salib

KHud meri maut ka matam hai mere jine mein

apne andaz se andaza lagaya sab ne

mujh ko yaron ne ghalat kar liya taKHmine mein

apni jaanib nahin ab lauTna mumkin mera

Dhal gaya hun main sarapa tere aaine mein

ek lamhe ko hi aa jae mayassar 'kaifi'

wo nazar jo mujhe dekhe mere aaine mein