zulf-o-zanjir se nikal aaya

zulf-o-zanjīr se nikal aayā

lafz tāsīr se nikal aayā

us ke aane kī der thī aur bas

'ishq tahrīr se nikal aayā

saath apne shikast-e-dil kar ke

maiñ dar-e-mīr se nikal aayā

dil kī duniyā badal ga.ī merī

'aks tasvīr se nikal aayā

ek bosīda shawl le kar maiñ

apnī jāgīr se nikal aayā

mere zaḳhmoñ ko phir milī rāhat

paaoñ zanjīr se nikal aayā

aaj tak jo na kar sakī duniyā

kaam vo hiir se nikal aayā

dekhte dekhte huā kal shab

ḳhvāb tā'bīr se nikal aayā

zulf-o-zanjir se nikal aaya

lafz tasir se nikal aaya

us ke aane ki der thi aur bas

'ishq tahrir se nikal aaya

sath apne shikast-e-dil kar ke

main dar-e-mir se nikal aaya

dil ki duniya badal gai meri

'aks taswir se nikal aaya

ek bosida shawl le kar main

apni jagir se nikal aaya

mere zaKHmon ko phir mili rahat

paon zanjir se nikal aaya

aaj tak jo na kar saki duniya

kaam wo hir se nikal aaya

dekhte dekhte hua kal shab

KHwab ta'bir se nikal aaya