sab ke hisse mein kai bar hai baT kar dekha

sab ke hisse meñ ka.ī baar hai baT kar dekhā

kuchh na hāsil huā manzar se bhī haT kar dekhā

duur be-kār sā mub.ham sā nazar aatā huuñ

aa.ine se bhī bahar-taur chimaT kar dekhā

hai musalsal mire sar dhuup kisī sahrā sī

laakh dīvāroñ ke saa.e se lipaT kar dekhā

farq hone se na hone se mire kuchh bhī nahīñ

bār-hā ham ne kahānī meñ simaT kar dekhā

kitnī hasrat thī ki anjām badal jā.egā

varaq āḳhir kā ka.ī baar palaT kar dekhā

phir yahī hotā hai rah jaatā huuñ tanhā maiñ hī

vaqt ke saaz ko har lai ko ulaT kar dekhā

jitnī shiddat se mire ḳhvāb ko toḌā gayā hai

utnī shiddat se vahī ḳhvāb hai DaT kar dekhā

jo parakh saktī hameñ aañkh mayassar na huī

apnī qīmat se bhī 'abrak' ne to ghaT kar dekhā

sab ke hisse mein kai bar hai baT kar dekha

kuchh na hasil hua manzar se bhi haT kar dekha

dur be-kar sa mubham sa nazar aata hun

aaine se bhi bahar-taur chimaT kar dekha

hai musalsal mere sar dhup kisi sahra si

lakh diwaron ke sae se lipaT kar dekha

farq hone se na hone se mere kuchh bhi nahin

bar-ha hum ne kahani mein simaT kar dekha

kitni hasrat thi ki anjam badal jaega

waraq aaKHir ka kai bar palaT kar dekha

phir yahi hota hai rah jata hun tanha main hi

waqt ke saz ko har lai ko ulaT kar dekha

jitni shiddat se mere KHwab ko toDa gaya hai

utni shiddat se wahi KHwab hai DaT kar dekha

jo parakh sakti hamein aankh mayassar na hui

apni qimat se bhi 'abrak' ne to ghaT kar dekha