pane ke liye hai na ganwane ke liye hai

paane ke liye hai na gañvāne ke liye hai

ye ziist udāsī se nibhāne ke liye hai

chehre se 'ayāñ hotī hai taklīf kī shiddat

hoñToñ pe tabassum to zamāne ke liye hai

har baar ḳhafā hotā hai is vāste mujh se

us ko hai yaqīñ koī manāne ke liye hai

is aañkh ko ab niiñd nahīñ hotī mayassar

ye aañkh tire ḳhvāb sajāne ke liye hai

vo vaqt Thahar jaa.e na us shab kī sahar ho

jo vaqt tire saath bitāne ke liye hai

kuchh der kī mohlat hameñ ai maut zarā de

ik vā'da abhī aur nibhāne ke liye hai

ek vo hī faqat ḳhush hai bulandī pe hamārī

duniyā hameñ har gaam girāne ke liye hai

is dil kī na ḳhvāhish na tamannā koī 'almās'

ye dil to tire naaz uThāne ke liye hai

pane ke liye hai na ganwane ke liye hai

ye zist udasi se nibhane ke liye hai

chehre se 'ayan hoti hai taklif ki shiddat

honTon pe tabassum to zamane ke liye hai

har bar KHafa hota hai is waste mujh se

us ko hai yaqin koi manane ke liye hai

is aankh ko ab nind nahin hoti mayassar

ye aankh tere KHwab sajaane ke liye hai

wo waqt Thahar jae na us shab ki sahar ho

jo waqt tere sath bitane ke liye hai

kuchh der ki mohlat hamein ai maut zara de

ek wa'da abhi aur nibhane ke liye hai

ek wo hi faqat KHush hai bulandi pe hamari

duniya hamein har gam girane ke liye hai

is dil ki na KHwahish na tamanna koi 'almas'

ye dil to tere naz uThane ke liye hai