KHwab hai KHwab mere pas wo aa jaega

ḳhvāb hai ḳhvāb mire paas vo aa jā.egā

aa ke zanjīr mire dar kī hilā jā.egā

TuuT jā.eñge ye gadrā.e hue phal ik din

kal kī mānind ye mausam bhī chalā jā.egā

hogī kāfūr shab-e-ġham kī siyāhī ik din

koī āñgan meñ mire chāñd ugā jā.egā

shahr vaalo dil-e-vahshī ko mire mat chheḌo

ye to dīvāna hai sahrā meñ chalā jā.egā

sham'-e-rah bujh ga.ī aayā jo havā kā jhoñkā

koī jhoñkā hī use aa ke jalā jā.egā

us kā fan zinda-e-jāved rahegā 'hindī'

vo jo paanī pe koī naqsh banā jā.egā

KHwab hai KHwab mere pas wo aa jaega

aa ke zanjir mere dar ki hila jaega

TuT jaenge ye gadrae hue phal ek din

kal ki manind ye mausam bhi chala jaega

hogi kafur shab-e-gham ki siyahi ek din

koi aangan mein mere chand uga jaega

shahr walo dil-e-wahshi ko mere mat chheDo

ye to diwana hai sahra mein chala jaega

sham'-e-rah bujh gai aaya jo hawa ka jhonka

koi jhonka hi use aa ke jala jaega

us ka fan zinda-e-jawed rahega 'hindi'

wo jo pani pe koi naqsh bana jaega