gum-shuda KHwab ki tabir liye aate hain

gum-shuda ḳhvāb kī tā'bīr liye aate haiñ

girya-e-hijr kī tafsīr liye aate haiñ

ek ham haiñ ki mayassar nahīñ ik musht-e-ġhubār

log bāzār se taqdīr liye aate haiñ

dil kā darvāza khulā rakhte haiñ ye soch ke ham

aane vaale kabhī jāgīr liye aate haiñ

kitne chālāk haiñ āñkhoñ meñ tabassum rakh kar

merī ḳhidmat meñ vo tā'zīr liye aate haiñ

rasm-e-mātam hai har ik shaḳhs gurezāñ hai yahāñ

ashk-pāre ruḳh-e-shamshīr liye aate haiñ

ḳhvāb-gāhoñ ko qarīne se sajāne ke liye

reg-o-sandal zar-o-zanjīr liye aate haiñ

ḳhatm hote hī nahīñ ḳhvāb-o-fasāna ġham ke

jān-o-dil nāla-e-shab-gīr liye aate haiñ

din guzartā hī nahīñ raat chalī aatī hai

dhuñdlake raat kī tasvīr liye aate haiñ

āh-e-sozāñ se bhī jalte haiñ havāoñ ke badan

silsile zaḳhm ke zanjīr liye aate haiñ

gum-shuda KHwab ki ta'bir liye aate hain

girya-e-hijr ki tafsir liye aate hain

ek hum hain ki mayassar nahin ek musht-e-ghubar

log bazar se taqdir liye aate hain

dil ka darwaza khula rakhte hain ye soch ke hum

aane wale kabhi jagir liye aate hain

kitne chaalak hain aankhon mein tabassum rakh kar

meri KHidmat mein wo ta'zir liye aate hain

rasm-e-matam hai har ek shaKHs gurezan hai yahan

ashk-pare ruKH-e-shamshir liye aate hain

KHwab-gahon ko qarine se sajaane ke liye

reg-o-sandal zar-o-zanjir liye aate hain

KHatm hote hi nahin KHwab-o-fasana gham ke

jaan-o-dil nala-e-shab-gir liye aate hain

din guzarta hi nahin raat chali aati hai

dhundlake raat ki taswir liye aate hain

aah-e-sozan se bhi jalte hain hawaon ke badan

silsile zaKHm ke zanjir liye aate hain