dil ab tak ye soch raha hai

dil ab tak ye soch rahā hai

ye milnā bhī kyā milnā hai

jaise koī anjān musāfir

raste meñ hairān khaḌā hai

jaise koī peḌ akelā

bādal kī jānib taktā hai

jaise koī chāñd kā TukḌā

dariyā dariyā bikhar gayā hai

terī yaad kā jhoñkā aayā

shaam kā āñchal bhiig chalā hai

jaane tū kab mujh se milī thī

jaane kab vo vaqt aayā hai

tū ne mujh ko chuum liyā thā

yā maiñ ne sapnā dekhā hai

raat ik aisī bhī aa.ī thī

yā jaane kyā mujh ko huā hai

tū ne jo kuchh mujh se kahā thā

ab vo mujh ko yaad aatā hai

tere sāñsoñ kī hiddat se

siina ab tak dahak rahā hai

tere lams kī aag lagī hai

merā badan pighlā jaatā hai

tujh se mil kar apne uupar

maiñ ne kitnā zulm kiyā hai

dil ab tak ye soch raha hai

ye milna bhi kya milna hai

jaise koi anjaan musafir

raste mein hairan khaDa hai

jaise koi peD akela

baadal ki jaanib takta hai

jaise koi chand ka TukDa

dariya dariya bikhar gaya hai

teri yaad ka jhonka aaya

sham ka aanchal bhig chala hai

jaane tu kab mujh se mili thi

jaane kab wo waqt aaya hai

tu ne mujh ko chum liya tha

ya main ne sapna dekha hai

raat ek aisi bhi aai thi

ya jaane kya mujh ko hua hai

tu ne jo kuchh mujh se kaha tha

ab wo mujh ko yaad aata hai

tere sanson ki hiddat se

sina ab tak dahak raha hai

tere lams ki aag lagi hai

mera badan pighla jata hai

tujh se mil kar apne upar

main ne kitna zulm kiya hai