bikhar rahi hai meri ruh bhi shabab ke sath
bikhar rahī hai mirī ruuh bhī shabāb ke saath
kuchh aur rang Dhale haiñ ab us gulāb ke saath
vo mere paas thā lekin dhuāñ sā lagtā thā
maiñ jī rahī thī kisī an-kahe se ḳhvāb ke saath
havā-e-shahr zarā us kā 'aks to laanā
vo thak gayā hai mirī jaañ kisī naqāb ke saath
'ajīb pyaas kā 'ālam hai merī hastī meñ
maiñ dauḌtī huuñ kisī dasht ke sarāb ke saath
likhī ga.ī hai shikast ab hurūf se pahle
vafā kā khel bhī khelā gayā hisāb ke saath
abhī to qurb kī ḳhushbū ne rasta DhūñDā thā
judā huā hai vo ab mausam-e-ḳharāb ke saath
bikhar rahi hai meri ruh bhi shabab ke sath
kuchh aur rang Dhale hain ab us gulab ke sath
wo mere pas tha lekin dhuan sa lagta tha
main ji rahi thi kisi an-kahe se KHwab ke sath
hawa-e-shahr zara us ka 'aks to lana
wo thak gaya hai meri jaan kisi naqab ke sath
'ajib pyas ka 'alam hai meri hasti mein
main dauDti hun kisi dasht ke sarab ke sath
likhi gai hai shikast ab huruf se pahle
wafa ka khel bhi khela gaya hisab ke sath
abhi to qurb ki KHushbu ne rasta DhunDa tha
juda hua hai wo ab mausam-e-KHarab ke sath
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
