aankhon mein ek silsila-e-KHwab sa raha

āñkhoñ meñ ek silsila-e-ḳhvāb sā rahā

be-nām sī talāsh meñ be-tāb sā rahā

ashkoñ meñ tere husn kī lau tairtī rahī

paanī ke āsmān pe mahtāb sā rahā

dariyā sī jab hayāt ko gahrā.ī mil ga.ī

sāhil ke ās-pās bhī girdāb sā rahā

laayā gayā zabāñ pe mujhe toḌ toḌ kar

maiñ ek dāstāñ thā magar baab sā rahā

andar to ābshār se mujh meñ girā kiye

aur dekhne meñ māhī-be-āb sā rahā

ḳhālī vujūd hī liye phirtā rahā magar

kāñdhoñ pe 'umr bhar mire asbāb sā rahā

naġhme bikhertā hai mirā harf-e-talḳh bhī

ḳhāma bhī mere haath meñ mizrāb sā rahā

ḳhā.if sā hai agar mirā lahja to kyā karūñ

fikr-o-nazar pe ġhalba-e-ā'sāb sā rahā

kaam aa.ī shā'irī bhī 'muzaffar' ke kis qadar

tanhā.ī meñ bhī majma'-e-ahbāb sā rahā

aankhon mein ek silsila-e-KHwab sa raha

be-nam si talash mein be-tab sa raha

ashkon mein tere husn ki lau tairti rahi

pani ke aasman pe mahtab sa raha

dariya si jab hayat ko gahrai mil gai

sahil ke aas-pas bhi girdab sa raha

laya gaya zaban pe mujhe toD toD kar

main ek dastan tha magar bab sa raha

andar to aabshaar se mujh mein gira kiye

aur dekhne mein mahi-be-ab sa raha

KHali wujud hi liye phirta raha magar

kandhon pe 'umr bhar mere asbab sa raha

naghme bikherta hai mera harf-e-talKH bhi

KHama bhi mere hath mein mizrab sa raha

KHaif sa hai agar mera lahja to kya karun

fikr-o-nazar pe ghalba-e-a'sab sa raha

kaam aai sha'iri bhi 'muzaffar' ke kis qadar

tanhai mein bhi majma'-e-ahbab sa raha