tere KHayal ne baKHshi thi jo KHushi na rahi

tire ḳhayāl ne baḳhshī thī jo ḳhushī na rahī

tumhāre ġham meñ jo shāmil thī dil-kashī na rahī

baḌe qarīb se dekhī thī ham ne sub.h-e-umīd

qarīb-tar hue jab ham vo raushnī na rahī

tum apne 'ahd-e-javānī ko ro rahe ho magar

ham apne haal pe rote haiñ zindagī na rahī

baḌe vasūq se ham mai-kade meñ aa.e the

nigāh-e-sāqī jo uTThī to tishnagī na rahī

hazār kahiye ki ye aag dil-lagī meñ lagī

jab aag lag ga.ī dil meñ to dil lagī na rahī

vatan vatan thā mire saath jo huā so huā

dayār-e-ġhair meñ kyā aabrū rahī na rahī

vo aa rahe haiñ vo aate haiñ aane vaale haiñ

ye aur baat ki āñkhoñ meñ jaan hī na rahī

talab talab hai magar daur bad-nasīb sā hai

ki ḳhvājgī to rahī banda-parvarī na rahī

mirī navisht meñ thī ḳhāk-e-do-jahāñ varna

tumhāre faiz-e-karam meñ to kuchh kamī na rahī

muhīt thī mirī hastī pe vo nigāh-e-karam

banī thī baat magar tā-ba-kai banī na rahī

vo ek baat ki jis par nisār thā 'vāsif'

vo baat jān-e-tamannā ko yaad hī na rahī

tere KHayal ne baKHshi thi jo KHushi na rahi

tumhaare gham mein jo shamil thi dil-kashi na rahi

baDe qarib se dekhi thi hum ne subh-e-umid

qarib-tar hue jab hum wo raushni na rahi

tum apne 'ahd-e-jawani ko ro rahe ho magar

hum apne haal pe rote hain zindagi na rahi

baDe wasuq se hum mai-kade mein aae the

nigah-e-saqi jo uTThi to tishnagi na rahi

hazar kahiye ki ye aag dil-lagi mein lagi

jab aag lag gai dil mein to dil lagi na rahi

watan watan tha mere sath jo hua so hua

dayar-e-ghair mein kya aabru rahi na rahi

wo aa rahe hain wo aate hain aane wale hain

ye aur baat ki aankhon mein jaan hi na rahi

talab talab hai magar daur bad-nasib sa hai

ki KHwajgi to rahi banda-parwari na rahi

meri nawisht mein thi KHak-e-do-jahan warna

tumhaare faiz-e-karam mein to kuchh kami na rahi

muhit thi meri hasti pe wo nigah-e-karam

bani thi baat magar ta-ba-kai bani na rahi

wo ek baat ki jis par nisar tha 'wasif'

wo baat jaan-e-tamanna ko yaad hi na rahi